Yolanda Huergo: "Al tripartitu namás-y esmolez cumplir con Madrid, non colos paraos"

La vocera de Compromisu culpa de la subida’l paro n’Asturies a la "obsesión por cumplir colos axustes" que tien el gobiernu asturianu

25 de xineru de 2013 DE 2013 • Glayiu

Yolanda Huergo, vocera de Compromisu por Asturies, calificó de "intolerables" los datos de la Encuesta de Población Activa de 2012. Asturies llidera la xubida del paru col 26,13% (114.100 paraos). "El tripartitu de PSOE, IX y UPyD escaecióse de les paraes y paraos, lo qu’esplica qu’Asturies llidere el paru en tol Estáu".

La formación soberanista entiende que “la obsesión con cumplir los oxetivos de déficit marcaos por Madrid, ta afogando entá más la economía asturiana, actuando como una bomba de recimu que destrúi hasta l’últimu rincón del nuesu texíu granible”. Pa Huergo ye ablicante que “al tripartitu asturianu lu feliciten dende Madrid por cumplir a raxatabla los criterios de déficit que nos marquen, mientres l’Estáu incumple con Europa, o nos obliguen a tener 10% menos d’endeldamientu que Valencia pa que puedan pagar avales a equipos de fútbol”.
Pa Compromisu por Asturies “el tripartitu de PSOE, IX y UPyD escaeció a les paraes y paraos, lo qu’esplica qu’Asturies lidere la xubida de paru en tol Estáu, con un aumentu del 26,13%” y punxo como exemplu a “los trabayadores de Suzuki que denunciaron insistentemente l’abandonu del Principáu, cuando Suzuki tien enforma qu’esplicar, como pa qué plantego un ERE si tenía claro que diba cerrar polos supuestos elevaos costos de producción”.
La vocera tamién destacó que “somos la Comunidá Autónoma con menor tasa d’actividá de too l’Estáu con un 52,37 %, lo que conderga a Asturies a la decadencia económica, con un avieyamientu de la población a un ritmu creciente” lo qu’esixe según Compromisu “planes específicos tantu pa parar la sangría de la emigración de los nuesos mozos, como oportunidaes llaborales na zona rural pa evitar que siga perdiendo población, yá que como siempres ye la gran escaecida en toles polítiques y na llaboral tamién” concluyó.