...y al final fue alcalde.

29 de marzu de 2013 DE 2013 • Glayiu

Finalmente, Ignacio Fernández ye’l nuevu alcalde de Cuideiru tres un plenu tensu del que echaron a los vecinos críticos col so nomamientu "a deu".

Lluéu de la renuncia del anterior mandatariu, Gerardo Herrero, por tar involucráu nun procesu de presuntu cohecho por cobros illegales, la FSA propuso a Ignacio Fernández, que nun taba nes llistes del PSOE nes últimes eleiciones municipales.
Nel plenu del Ayuntamientu de Cuideiru del miércoles 27 de marzu finalmente salió elexíu alcalde Ignacio Fernández, ente glayíos, emburriones, menaces, arrestos y enganchaes pola repulsa de parte de los vecinos de la villa pixueta a que’l nuevu alcalde fuera una persona que nin siquiera taba nes llistes del partíu ganador de les eleiciones municipales. Fernández, "discípulu de Kiko, el imputáu", afirmen dende la Plataforma pola Democracia en Cuideiru, refiriéndose al diputáu socialista Francisco González, venceyáu xunto al anterior alcalde de Cuideiru a la denuncia por presuntos cobros illegales a hosteleros locales, arranchó un colchón afín pal plenu, con "un grupu grande militantes socialistes comandáu pol secretariu d’organización de FSA, Jesús Gutiérrez", relata Estefanía Torres, de Democracia en Cuideiru. "Nosotros conseguimos entrar depués de tar esperando dos hores. Lluéu d’identificanos en Recepción, pasaron unos minutos y, ensin haber abierto la boca nin armar baruyu, l’alcaldesa en funciones decidió desaloxanos. El baruyu namá vino de los afines a Kiko. Nós llevábamos la cara pintada de rojo por la vergoña que nos daba la elección d’un alcalde a deu, escoyíu, amás por un imputáu".
Pero amás del xaréu del que salió alcalde Ignacio Fernández, la xornada tuvo más incidentes. La Plataforma pola Democracia en Cuideiru presentó denuncia ente la Guardia Civil contra Jesús Gutiérrez porque "a la salida del plenu amenazó con osties al nuestro compañeru Samuel".