"A Xixón nun la puede representar un personaxe como Rato"

28 de xunu de 2013 DE 2013 • Glayiu

Compromisu por Xixón pide al Ayuntamientu que retire la condición de "Fíu Adoptivu" a Rodrigo Rato. "Non puede dase una reconocencia a una persona que representa los
peores aspeutos de les causes de la crisis que tamos sufriendo"

Compromisu por Xixón entiende que nomar “fíu adoptivu" de la ciudá a una persona, trai un grau de reconocencia de la ciudá a la persona, y confier un grau de representatividá a la persona al respective de la ciudá y creen que anguaño, ni Xixón puede dar una reconocencia a una persona que representa los peores aspeutos de les causes de la crisis que tamos sufriendo, y de la mesma Xixón nun puede dexar que la represente un personaxe como Rodrigo Rato”.

Daniel Fernánde portavoz en Xixón recordó que "el Plenu del 14 de xunu aprobó, por
unanimidá, el sofitu a los afectaos pola preferentes y delda subordinada, colo que nun
tien sentíu caltener la condición de Fíu Adoptivu a unu de los principales responsables d’esa estafa y polo tanto lo único coherente agora mesmu ye retirar
la distinción, yá que en casu contrariu la votación del pasáu plenu sería un mero paripé”.

Pa Compromisu por Xixón “más allá de les diferencies ideolóxiques con Rodrigo Rato, que son evidentes, tamos falando d’una persona que frente al FMI acallantó a toles voces autorizaes qu’anunciaben lo que diba asoceder y l’españíu de la crisis de la zona euru, y que ta implicáu, independientemente de les responsabilidaes xudiciales que se deriven de les sos actuaciones, na estafa que supunxo la salida a bolsa del Bankia”, y añedió que “Xixón nun se merez que se venceye’l so nome al de Rodrigo Rato”.

Dende Compromisu por Xixón van animar a la ciudadanía a que se manifieste sobre la figura de Rodrigo Rato al traviés de les redes sociales cola etiqueta: #PasandoDelRato, por que pueda amosase el refugu, que tan convencíos qu’esiste, a que Rodrigo Rato sía Fíu Adoptivu de Xixón.