Victoria hestórica de l’asamblea de trabayadores de Tenneco-Xixón

17 de febreru de 2014 DE 2014 • Glayiu

La Asamblea llogra una sentencia del Tribunal Superior de Xusticia d’Asturies pola que se declara nulu’l despidu coleutivu de la plantía Tenneco y condérgase a la empresa a la realmisión de tolos y toles trabayadores nel so puestu trabayu, col pagu de tolos salarios dexaos de percibir dende la fecha’l despidu

La sentencia ye inapellable y obliga a la empresa a caltener abierta la planta de Xixón y reincorporar, sí o sí, a la totalidá de los y les trabayadores al so puestu trabayu.

La unidá de l’Asamblea, percima de sigles sindicales, la negativa de toos y caún de los y les trabayadores a vender el so puestu trabayu, l’actitú de pescanciar l’Asamblea como únicu muérganu decisión, la movilización continuada demientres toos estos meses de llucha y el sofitu del pueblu asturianu a les sos reivindicaciones, llevaron a los y les trabayadores de Tenneco a algamar una victoria que, ensin dulda, va tener una importancia decisiva pal restu les empreses asturianes en conflictu llaboral.

El frente d’unidá obrera creáu n’Asturies y formáu polos y poles trabayadores d’un bon númberu d’empreses, tien agora’l camín abiertu pa llevar alantre una nueva forma de faer sindicalismu que, non solamente caltién la honradez desixida a la llucha obrera, sinón que s’amuesa como la más eficaz.

En palabres d’ún de los voceros de los y les trabayadores de Tenneco: “la cosa nun ye tan difícil: l’Asamblea alderica, decide y moviliza, los voceros negocien al dictáu de l’Asamblea, los sindicatos sofiten les decisiones de l’Asamblea y el pueblu acueye y amplifica esta llucha. Per esti camín, la llucha obrera ye imparable. La unidá de l’Asamblea y la negativa a vender los puestos de trabayu, fueron les ferramientes decisives d’esta victoria pa clas obrera asturiana”.