Uniovi escaez l’asturianu

26 de marzu de 2013 DE 2013 • Glayiu

Les asamblees d’estudiantes d’Uniovi y el Conceyu Universitariu pol Asturianu denuncien que la Universidá d’Uviéu elliminó la versión n’asturianu de la recién remocicada web del estamentu, "un pasu atrás históricu na normalización de la llingua asturiana na institución", en pallabres de los representantes del alumnáu. El CUPA desixe al Rector que cumpla los alcuerdos que roblara con ellos en materia llingüística.

Na recién estrenada páxina web de la Universidá d’Uviéu el menú de navegación ufre la escoyeta ente’l castellán y l’inglés, escaeciendo l’asturianu, presente na versión anterior del portal universitariu.
Les asamblees d’Uniovi condenen la desapaición del asturianu "magar que s’usare na versión anterior, que -a diferencia de la inglesa- tea protexida esplícitamente polos Estatutos de la Universidá y que’l so usu institucional, tamién na páxina web, ye un compromisu esplícitu del Rector Vicente Gotor". Por ello demanden la pronta rectificación d’esta omisión: "l’usu institucional de la llingua asturiana xunto a la castellana y otres ha ser normal y un deber na universidá pública d’Asturies y, poro, solicitamos públicamente que s’igüe esti grave retrocesu na normalización del idioma". Na mañana de güei martes los representantes estudiantiles presentarán una quexa formal ente’l muérganu cimeru de la Universidá.

Pela cueta, el CUPA (Conceyu Universitariu pol Asturianu) amuesó "el so
descontentu pola apaición d’una páxina web de la Universidá d’Uviéu (www.uniovi.es) con versión namás en castellán ya inglés, cuando dende l’añu 2010 la páxina de la universidá asturiana tenía una versión na llingua propia d’Asturies, que foi mui bien recibida pola comunidá universitaria.
Represenantes del CUPA yá solicitaron esplicaciones y esperen respuesta del Rector Vicente Gotor y del Vicerrector d’Informática, Víctor Guillermo García. "Aguardamos que se trate d’una situación temporal y que la páxina cunte con versión n’asturianu en pocu tiempu", espliquen dende la organización, que tamién denuncia que "lo contrario sedría dar un pasu atrás mui importante y contrariu a los alcuerdos algamaos pol Rector nes pasaes elecciones, onde se comprometió a afondar na normalización y usu del asturianu dientro de la institución".
El CUPA aprovecha pa recordar qu’entá queden munchos compromisos por cumplir, ente los que tán el dotar a la Universidá d’Uviéu d’un logotipu billingüe (castellán/asturianu) y redactar un reglamentu que disponga la rotulación n’asturianu de toles instalaciones, ente otres cuestiones de vital importancia pal idioma na Universidá y que’l Rector Vicente Gotor robló col CUPA nel Alcuerdu Programáticu de Política Llingüística na Universidá d’Uviéu, pal periodu actual.