Un trabayador muertu nel astilleru Armón

El buzu, que trabayaba baxo condiciones que nun cumplíen cola lexislación vixente, morrió afogáu

17 de xunetu de 2013 DE 2013 • Glayiu

El buzu trabayaba somorguiáu a 4 metros na llimpieza de la dársena de botadura del astilleru. Morrió afogáu ensin que los compañeros que lu ausiliaron fueran quien a reanimalu una vez se decataron de que tenía problemes. Les denuncies por falta de seguiridá nes condiciones de trabayu n’Armón veníen avisando de que podía ocurrir un accidente llaboral como el d’ayeri.

Fernando R., el trabayador de la subcontrata Trabajos Especiales Marítimos taba llimpiando la dársena de botadura del astilleru xixonés baxo l’agua a cuatro metros de profundidá. Tenía como únicu sofitu a otru trabayador, que curiaba del sistema de respiración artificial. En decatándose que nun salíen borboyes de la respiración del buzu, tiróse al agua pa sacalu y entamó les primeres maniobres de reanimación. La llexislación llaboral vixente desixe un equipu mínimu de cinco persones pa trabayos subacuáticos: dos buzos, un auxiliar en superficie pa caún d’ellos, y un responsable del equipu.
Dende hai meses distintes voces vienen avisando de la falta de medides de seguridá nel astilleru xixonés, que carez mesmamente d’una ambulancia cola que treslladar a los trabayadores mancaos. Armón funciona con ensin plantiya propia, con mano d’obra estrictamente subcontratada. La subcontratación d’empreses pa facer toles llabores de la construcción naval conlleva necesariamente al abaratamientu de les partides económiques y con ello a la precarización de les condiciones de trabayu.
La Corriente Sindical d’Izquierda acaba d’emitir un comunicáu nel que recuerden les tres denuncies interpuestes nos xulgaos por "gravísimos incumplimientos en materia de seguridá llaboral y el riesgu que supón eso pa los trabayadores", al tiempu que desixen la intervención urxente de les autoridades llaborales y les instituciones polítiques "que consideren a Armón ’empresa exemplar’". La CSI encamienta tamién a la propia empresa a que "nun aforre en costes productivos a costa de la seguridá de los trabayadores y al brutal incrementu de la producción".