Trabayadores públicos d’Uviéu percuerren les tiendes col lema ’solo vengo mirar, nun me algama pa mercar’

4 de xineru de 2013 DE 2013 • Glayiu

Ayeri xueves 3 de xineru, l’Asamblea Xeneral de Trabayadores Públicos d’Asturies, convocó una acción de protesta poles cais más comerciales d’Uviéu, percorriendo la cai Uría y les tiendes más allegaes del centru, portando pegatinas y cartelos col lema «Sientolo, soi emplegáu públicu, namás vengo mirar, nun me algama pa merca». .

Siguiendo asina colos seis meses ininterrumpíos de llucha contra los retayos d’empléu, de derechos y de salarios, y contra les agresiones a los servicios públicos que ta recibiendo tola sociedá per parte del Gobiernu Central del PP, cola collaboración del Gobiernu asturianu del PSOE, encantáu con poder faer lo mesmo echando la culpa al otru.

JPEG - 42.8 KB

Según informó l’Asamblea de Trabayadores Públicos en nota de prensa, l’oxetivu d’esta protesta, ye "treslladar a la sociedá asturiana que la supresión de la paga extra pa más de 30.000 emplegaos públicos n’Asturies, amás de ser un atracu, supon un grave problema pa la economía d’estos miles de families de trabayadores de los servicios públicos, pero tamién pa la economía asturiana".

El colectivu señalaba "Esi dineru que nun sale a la cai tamién perxudica a otros sectores de la economía granible, que van ver amenorgaos los sos ingresos, les sos vientes y los sos negocios pola política d’un Gobiernu que prefier que’l dineru vaya pa bancos y banqueros".