Total respaldu a lxs trabayadorxs de Tenneco

31 de xineru de 2014 DE 2014 • Glayiu

Cientos de trabayadores despidíos o en conflictu llaboral, n’empreses como Benito Sistemes, Caxastur, Fundición Nodular, intoxicaos por mercuriu n’AZSA, Cocines Asturianes, Cébrano, Mataderu Central, Subcontrates Mineres, Coca-Cola, Fábrica d’Armes, Llavandería de Cabueñes o Starglass, ente otres, allegaron güei en sofitu a los y les trabayadores de Tenneco.

Güei pola mañana na plaza la Catedral d’Uviéu, convocaos pola asamblea de Trabayadores de Tenneco y coincidiendo cola cellebración, nel Tribunal Superior de Xusticia d’Asturies, del xuiciu pol ERE impuestu pola direición de la empresa, coles mires de pesllar definitivamente la planta de Xixón. Cientos de persones participaron na que fue la primera de les movilizaciones, dempués de que’l pasáu xueves se creare n’Asturies un frente de xunidá obrera formáu por asamblees y coleutivos de trabayadores de numberoses empreses yá zarraes, n’ERE, con despidos o en conflictu llaboral.

Voceros de los y les trabayadores de les estremaes empreses, anunciaron el so enfotu en continuar enenchando esti frente de xunidá obrera creáu n’Asturies y la so intención de siguir convocando toa triba movilizaciones, pa torgar la sangría despidos y pieslles d’empreses que ta dándose n’Asturies.