Suzuki pieslla la so factoría de Xixón

Compromisu por Xixón afirma que’l cierre "esixe acabar cola austeridá y los retayos".

6 de payares de 2012 DE 2012 • Glayiu

Graciano Torre, conseyeru d’Economía ya Industria del gobiernu asturianu, vien d’informar de les intenciones la firma xaponesa Suzuki de pesllar en marzu del añu que vien la so factoría de Xixón, que da trabayu directu a 200 empleaos. Según Torre, "la decisión taba tomada direutamente dende Xapón, polo que les iniciatives del gobiernu asturianu pa negociar otres posibles alternatives topáronse cola negativa de la empresa".

La noticia diéronla representantes de la empresa xaponesa al gobiernu asturianu en reunión cellebrada esta mesma mañana. Según el conseyeru, "el gobiernu asturianu trató de negociar alternatives al pieslle, pero Suzuki caltuvo la so postura "irreversible". La empresa cifra en 30 millones d’euros nos últimos cuatro años les pérdides de la so planta de Xixón, polo que decidió echar la tranca el prósimu 31 de marzu. La política llaboral de Suzuki pasa agora por zarrar toles factoríes d’Europa y producir namás en Xapón.
Siempre según Graciano Torre, " Aseguró tamién el conseyeru que "agora hai que planificar el pieslle ordenáu de la fábrica", y que tovía esiste la posibilidá de mantener la parte comercial de la venta de motos, colo que’l ERE al qu’empobina la empresa "puede afectar a 170 de los 200 puestos de trabayu".
Acabó Graciano Torre tildando de "nefasta" la noticia.

Pela cueta, Compromisu por Xixón, de boca del so cabezaleru Daniel Fernández, fue la primera fuerza política en retrucar al conseyeru. Fernández asegura que’l zarru de Suzuki en marzu esixe "acabar cola austeridá y los retayos". Fernández afirma que’l "zarru xuníu al récord de paru nel mes d’ochobre, escriben una ciudá a piques del colapsu económicu", a la vez que reclamó midíes urxentes tantu a nivel municipal como autonómicu pa desaniciar el drama del paru na ciudá, agraváu inda más col zarru de Suzuki en marzu. “La política tien recursos pa encarar esti tipu de situaciones económiques, pero claru si lo que se quier ye protexer los intereses de quien provocaron la crisis, la única vía posible ye arruinanos a tolos demás, que somos la inmensa mayoría”.

Pa Compromisu por Xixón ye inadmitible que “el tripartitu asturianu de PSOE, IX y UPyD tresllade a Asturies les polítiques del gobiernu de Rajoy y el bipartitu de Xixón de Foru y PP aplicar, ensin que nengún d’ellos ponga alternatives enriba de la mesa pa solucionar los problemes acuciosos de les persones que tán perdiendo les sos viviendes y tienen verdaderes dificultaes p’aportar a una alimentación fayadizo pa ellos y los sos fíos, y nun ye demagoxa, si non que lo ve cualesquier que sala a la cai y nun se zarre nos sos despachos”.

Daniel Fernández afirma que “Xixón ta a piques del colapsu económicu, que non d’esbarrumba más poles altes xubilaciones y prexubilaciones que caltienen la ficción de ciertu consumu internu” y que “poles bones o poles males, tenemos que parar estes polítiques económiques primero que los sos efectos sían irreversibles, y dar respuesta inmediata a unos ciudadanos desesperaos ante la inoperancia de la clase política” concluyó.