SUATEA denuncia la desapaición del asturianu nel currículu cola llei Wert

Magar que los informes xurídicos avalen la so validez como "especialidá de plenu reconocimientu"

14 de xineru de 2013 DE 2013 • Glayiu

El sindicatu asturianu de la enseñanza SUATEA denuncia que nel nuevu currículu escolar que remana la llei del ministru Wert l’Asturianu desapaez como asignatura al nun tener el calter d’especialidá. Ocurre esto magar que los caberos informes xurídicos al respectu camentaben que "nun hai torga llegal ninguna pa que l’asturianu nun seya una especialidá de plenu reconocimientu", y con ello asignatura con tolos derechos dientro’l sistema educativu.

Pa SUATEA la única midía que garanciza la sobrevivencia de la Llingua Asturiana como asignatura dientro de los planes d’estudio ye la so inclusión como especialidá, daqué qu’afaló facer a la Conseyería d’Educación del Principáu: "Esta midida nun garantizaría ella sola la pervivencia del Asturianu y el Gallego-Asturiano nel enseñu de la nuestra comunidá autónoma, pero diba ser un reblagu de xigante nel so afitamientu y amosaría’l verdaderu interés del gobiernu asturianu en echar p’alantre esta demanda de la inmensa mayoría de la sociedá asturiana", afirma Faustino Zapico, ún de los portavoces del sindicatu.
L’Asturianu lleva presente 30 años nel sistema educativu del Principáu, afitada pola Llei d’Usu y otres midíes llegales parciales que fueron permitiendo cierta presencia del aprendimientu n’asturianu nes escueles, pero enxamás como asignatura de plenu derechu porque nun esiste una especialidá que la respalde como tal. A esto hai qu’amestar los incumplimientos reiteraos de la Llei d’Usu y les torgues a la enseñanza del asturianu y el gallego-asturiano fueron nefastos pal avance y l’afitamientu de la nuestra llingua. Por eso tamién-y plantegamos a la Conseyera que la única medida que pue blindar la enseñanza de la Llingua ye la declaración d’oficialidá del Asturianu".
Anguaño la LOMCE ta en fase de desendolcu de borradores, polo qu’inda hai tiempu pa que torguen les condiciones que diben suponer el desaniciu dafechu del Asturianu como asignatura. El día 19 aconceya otra vuelta nuevamente la Conferencia Sectorial de Educación y habrá probablemente dalguna novedá nel Anteproyectu de Llei de la LOMCE Tamién el día 19 celébrense actos en defensa de les llingües del estáu énte l’ataque al so status y a los avances n’inmersión llingüística algamaos neses comunidaes.
Magar lo críticos que son dende Suatea polos valores de discriminación, segregación, machismu y privatización, nel casu de la Llingua Asturiana los voceros del sindicatu asturianu echen la pelota pal teyáu del gobiernu autonómicu: "la oficialidá ye la solución más afayadiza pal problema, dalgo que refuga dafechu’l gobiernu del Principáu, como confirmó recién la conseyera d’Educación, Ana González. Llueu taría una alternativa posibilista: que la llei incorporara una referencia específica p’aquelles llingües non cooficiales, esto ye, la propuesta fecha pola Academia de la Llingua Asturiana’l mes pasáu. El casu ye que’l tiempu cuerre a la escontra y les soluciones pal asturianu nun acaben de llegar."
Zapico terminó la so intervención convocando al profesoráu de Llingua Asturiana a una asamblea que va facese el 15 de xineru a les 18:00 hores nel IES Aramo d’Uviéu, y onde va informase de la nueva situación y van proponese midíes de llucha pa defender la nuestra Llingua y refugar dafechu la LOMCE.