¿Somos suxetos revolucionarios o usuarios d’una posible revolución?

11 de marzu de 2013 DE 2013 • Pablo M. Testa

La pallabra revolución, a min, a vegaes suéname estraña. Suéname llonxana, en dalgunos círculos fasta falsa. Suéname como d’otru tiempu. Asina tamién mos educaron. La fin de la hestoria fukuyamista gabitó esi pensamientu, sobro too a la forma de cuntar la hestoria, que nesti casu retruca a un xacíu más ideolóxicu que nacionaliegu.

Afayámonos equí, nún de los principales enquizos o torgues colos que mos atopamos: la nuesa incapacidá pa sentinos suxetos revolucionarios. Enantes d’entamar cualisquier conceyu tenemos de saber si lo que queremos ye llamar l’atención, esparder la rabia o englobar too eso en facer la revolución. En sí, xustamente, lo que naguamos por facer ye axeitar una revolución o non, porque nesi casu tendremos d’axeitala y facer esos conceyos en consecuencia. Articular toles nueses aiciones dica’l llevantamientu, pero tamién dica la victoria. Esta vegada tenemos de ganar.

Tenemos de dexar esa consciencia inconsciente, abondes vegaes, de ser usuarios pa convertinos en participantes d’un procesu que revierta n’apurrinos el control de les nueses vides. Tomar parte tanto de la problematización como de la solución a les torgues, qu’a lo llongo les nueses vides, apaecerán. Nun podemos asperar yá. Yá lo dicía Tiqqun. Nun podemos asperar a que daquién mos fale de revolución, sumándonos a ella como xates detrás d’un pastorín. Nesi momentu pasaríemos, entós, a ser usuarios d’una revolución y non suxetos revolucionarios. Creyemos el nuesu llevantamientu, pa sentir el mesmu arrechu pa con nós y el nuesu entornu, como lo sentimos cuando falamos de llevantamientos pasaos. Pa nun retozar na señaldá continua y amburante (ver primer artículu escritu na nueva era Glayíu por mí). Pa saber que somos capaces, que lo intentamos y, por qué nun dicilo, lo algamamos.

Munches persones, nesti casu, tópense cola desesperación, col desánimu, col esayimientu, cola desesperanza, col pesimismu. Munches quieren, amás, un curtiuplacismu nos procesos de solución, que-yos van amburando selemente y grandonamente (...) Y ún de los motores pa, precisamente, esfarrapar dicha llóxica -globalmente- ye poner, enriba la mesa, un proyeutu que dafechu, y de forma tanxible, en forma de fechos, evidencie otra psicoloxía a poder llevar a cabu.

Seyamos suxetos revolucionarios. Creyemos la nuesa revolución. Llevantémonos y afoguemos a la bisarma que mos escarma, estrapaya y oprime. Tomemos les nueses vides; pongámosles n’activu.

Y nesta cuestión, digo más. Munches persones, nesti casu, tópense cola desesperación, col desánimu, col esayimientu, cola desesperanza, col pesimismu. Munches quieren, amás, un curtiuplacismu nos procesos de solución, que-yos van amburando selemente y grandonamente. Juan Pastor, nel so artículu, cuando fala de la llóxica psicolóxica del capitalismu, qu’hai de vencer más que la llóxica reproductora del mesmu, fai bien. Incluyiría, amás, esa necesidá curtiuplacista del agora o enxamás. Y ún de los motores pa, precisamente, esfarrapar dicha llóxica -globalmente- ye poner, enriba la mesa, un proyeutu que dafechu, y de forma tanxible, en forma de fechos, evidencie otra psicoloxía a poder llevar a cabu. Tenemos de saber qu’hai, curtiuplacistamente falando, de facer yá. Pero nun podemos caltener esi curtiuplacismu nel algame l’oxetivu, porque sedría enfallanos a nós mesmos. Hai de poner en marcha los mecanismos d’emancipación y d’empoderamientu cuanto enantes, pa que l’algame de los oxetivos se produza lo más ceo posible, sabiendo que podemos y somos capaces de vivir esi cambéu, pero que la vida ye llonga, los cambeos tamién, y les resistencies por parte de grupos privilexaos van intentar, por tolos medios, frenalos a embute.

Nun llanciemos, lluchemos. Nun mos quexemos, faigamos na quexa. Nun falemos namái na barra’l chigre, falemos pa construyir otros mundios, otres formes de vida, otres estratexes pa vivir d’otru mou. Salgamos a la cai, con un oxetivu, o dellos, concretu. Sofitemos a comuña. Faigmos Pueblu na rebelión.