Somos porque facemos

10 de avientu de 2012 DE 2012 • Pablo M. Testa

Dalgunos, dende lo lloñe que queden los nuesos llares d’anguaño de lo que fuere y ye la nuesa tierra, vamos lleendo la información que mos llega d’estremaes maneres. Hebo un tiempu, nun hai muncho, que la xente salía peles cais de Madrid glayando "¡Dinamita eh!, ¡dinamita eh, oh, eh!". Pal mio pá y pa min fueron momentos de gran emoción... ver a aquella xente qu’un res tenía de ver cola minería salir a la cai p’amosar la so solidariedá. Pero como ye vezu, too quedó en simples glayíos puntuales, concretos, que nun gabitaben nin rinxu. La famosa llucha minera diba desentullando. Desentullábase pol propiu enquizu internu que tien la minería, en concreto l’asturiana, y en xeneral toa estaya llaboral, pola so estrutura y pol usu que se fai d’ella. ¿Qué asocede?

Asturies muerre de señardá, señardá de sí mesma. Tal y cómo-y pasa a los movimientos sociales. Viven de l’alcordanza de lo qu’una vegada fueron o pudieron ser. Les xornaes y/o actividaes que se faen son d’alcordanza de momentos hestóricos, de grandes asocederes de la hestoria, de lluches pasaes que paecen caltener un daqué nel presente. Escaecer ye malo, pero pior ye caltenese nun discursu cuasi-anacrónicu, qu’embodeca cualquier llucha o facer. Paez qu’esa forma de lluchar, qu’entra d’acordies cola llóxica de la resistencia, nagua pola estaticidá qu’esa mesma llóxica caltién y reproduz. N’Asturies, fálase del 34, del 25 mayu, del reinu asturianu, de los ástures antirromanos, de los celtes, de la llucha asturiana escontra tolo que la manca. Curiosamente combayamos esos momentos hestóricos au se fixeron coses, se creyaron coses, se construyeron coses. Y asina, fueron de gran gabitu, fuimos de gran gabitu, los movimientos sociales, de La Fin de la Hestoria fukuyamista. Dexamos de facer coses nós, pa invertir el nuesu tiempu en recreyanos en dientro la nuesa estaya. Poro, valió yá de resistir escontra los pantasmes del pasáu y del anguaño. Entamemos creyar, construyir, facer... como Pueblu o Comunidá. Nel xacíu más fonderu de Comunidá o Pueblu.

Los caberos artículos apaecíos en Glayíu, caún dende la so goyada, pero igualmente válidos, ún de Diego Díaz y l’otru de Nacho Muñiz, vienen a solliñar el mesmu aspeutu... La falta de Comunidá. La falta de facer coses dende’l pueblu dica’l pueblu. Fai falta una solución conxunta pa "ganar" como diz Díaz y como nagua Muñiz. Los movimientos sociales deben replantegase les sos estratexes pa poer alitar dica la mayor de les utopíes; dende lo concreto, lo puntual, fasta lo más estrutural que puea haber. Ellos deben arrenunciar a los sos purismos, a les sos postures inmutables, pa, precisamente, algamar lo qu’allampien. Deben caleyar, xunto al pueblu, dica un oxetivu a comuña.

Nun falta compromisu n’Asturies -yá quinxeren otro llugares tener la participación política qu’esiste ellí-, lo qu’asocede ye qu’esi compromisu caleya n’estremaes estayes, que siendo milenta, en dientro de caúna, esiste’l talantar de que nun hai xente asgaya. Sicasí, si se xuncieren toes eses estayes vives, veríen cómo nun hai tan poco xente comprometío; veríen q’Asturies alienda, daveres, entá... Demientres, arrequexada nes alcordances de la so hestoria, sofre pola nuesa propia absurdez.

Hai un exemplu pernidio au vivo: Alcalá d’Henares, llugar curiosu onde los haiga, con torgues asgaya, pero tamién con descomanaes ventayes. Prestábame compartir con vós lo qu’asocede nesta ciudá d’hestories turbies. Equí surde una retruca a tener en consideranza. Pero esa fas prefiero continuala n’otru momentu. Convídovos, pues, a seguir y lleer esti blog qu’apunta direiciones y posibilidaes: http://asamblealiberacionespaciosalcala.blogspot.com.es/