Solución pa la docencia de la llingua asturiana

18 de avientu de 2013 DE 2013 • Glayiu

Dende’l sindicatu SUATEA desixen darréu una solución clara pa la docencia de la llingua asturiana y entienden que l’alministración asturiana nun puede siguir safándose de la so responsabilidá nun problema que lleva abiertu décades. L’aprobación de la nueva llei d’educación puede suponer una nueva agresión a les materies de llingua asturiana y de gallego-asturiano

Con motivu de l’aprobación va dellos díis de la nueva llei d’educación (LOMCE), qu’implica una modificación curiosa del currículu en toles asignatures, SUATEA entiende que ye’l momentu d’iguar la situación de precariedá del enseñu de la llingua asturiana, situación que lleva décades ensin tener una solución clara que dignifique definitivamente la situación de la materia y los docentes de la mesma.

Dende l’aniciu de la presencia na escuela de la llingua asturiana, yá nel cursu 1983-84, la materia pasó per dellos encaxes normativos qu’en nengún casu valieron pa da-y una presencia amañosa en condiciones de normalidá y igualdá col restu de les asignatures. Asina, pesie a toles promeses, sigue ensin haber una especialidá docente que permita un accesu a la mesma de los docentes interesaos, que son anguaño interinos nun 95% de los casos. Sigue habiendo torgues pa la xeneralización de la ufierta en tolos tramos educativos y sigue ensin ser llingua vehicular en nenguna otra materia, pesie a la demanda existente nel alumnáu y la disponibilidá de profesionales pa facela.

L’aprobación de la nueva llei d’educación puede suponer una nueva agresión a les materies de llingua asturiana y de gallego-asturiano. Yá nel primer borrador de la llei la materia directamente desapaecía, y foi la presión social y la movilización de los docentes de l’asignatura y los colectivos implicaos na defensa del idioma lo que fexo que s’incluyera una modificación nel proyectu que dexaba la puerta abierta a un desendolcu normativu de la materia per parte del Principáu.

Dende SUATEA saben que la única solución clara pa encaxar dafechu y dignificar la llingua asturiana y el gallego-asturiano nel sistema educativu ye la oficialidá, qu’esti sindicatu vien reclamando dende la so fundación. Pero tamién sabemos que, énte l’ausencia absoluta de voluntá política per parte del gobiernu asturianu pa iguar esta situación, ye necesaria la presión social pa que la contrarreforma educativa del gobiernu central nun implique un deterioru tovía mayor de les condiciones nes que s’imparte l’asignatura.

Por too ello dende’l sindicatu desixen que la obligada redefinición del currículu asturianu a consecuencia de l’aprobación de la nueva llei d’educación traiga una nueva situación pa la llingua asturiana y el gallego-asturiano onde:

-Se críe definitivamente la especialidá docente, s’incluya na plantiya ordinaria y salgan les places a concursu-oposición.
-Se garantice la dotación horaria amañosa de l’asignatura en tolos niveles.
-Se xeneralice la ufierta en tolos tramos educativos, dende educación infantil al bachilleratu.
-Se dea la posibilidá d’escoyer la llingua asturiana y el gallego-asturiano como llingües vehiculares d’otres materies.

P’acabar, SUATEA quier sorrayar que la igua d’esta inxusticia histórica ye responsabilidá esclusiva de l’alministración asturiana, y que polo tanto ye a esta a quien-y toca mover ficha pa solucionar un problema que tenía que tar iguáu cuantayá.