Solidaridá dende Asturies colos procesaos del TAV

12 de payares de 2013 DE 2013 • Glayiu

Dende la Corriente Sindical d’Izquierda y el Centru Social La Semiente desixen l’archivu de la causa escontra los “tartalaris” que se manifestaron a la escontra les obres del Tren d’Alta Velocidá n’Euskal Herría. La próxima selmana va tener llugar el xuiciu pola protesta de los tartazos a Yolanda Barcina.

El próximu llunes 18 Payares, va tener llugar na Audiencia Nacional, el xuiciu pola protesta de los tartazos a la escontra’l TAV na persona de Yolanda Barcina. Piden de 5 a 9 años de cárcel por unos tartazos qu’en cualquier país occidental tan solo seríen consideraos como una multa alministrativa.

El 27 d’ochobre de 2011, trés persones “entartaren” a la presidenta de Navarra, Yolanda Barcina, nel intre d’una sesión plenaria de la Comunidá de Trabayu de los Pirineos, na ciudá de Toulouse.

L’aición de protesta realizada pol movimientu de desobediencia al TAV Mugitu! tenía como oxetivu denunciar a Yolanda Barcina como principal responsable presente naquella xunta de la imposición del Tren d’Alta Velocidá en Euskal Herria (País Vascu), que dende los sos oríxenes amenó una amplia oposición.

En Toulouse, l’acción nun foi causa de nenguna detención nin identificación, llindándose guardar de seguridá a espulsar a los “tartalaris” de la sala. Sicasí, de regresu a Navarra, el autores de los tartazos fueron deteníos pola policía foral ya imputaos por un supuestu delitu de “atentáu a l’autoridá” na Audiencia Nacional española. Amás, una cuarta persona tamién foi darréu imputada so la mesma acusación pola so participación na aición de protesta de Toulouse y na rueda de prensa realizada al otru día en Iruñea (Pamplona) pa desplicar los motivos de l’acción.

Atopamonos énte una situación, paradóxica per otra parte, na que polos mesmos fechos pescudaos en Francia y que nun se consideren delitu, nel Estáu español, ábrese un procedimientu nel que tán pidiéndose elevaes penes de prisión.