Sofitu y respaldu a Samuel Fernández

10 de avientu de 2013 DE 2013 • Glayiu

Mañana miércoles 11 d’avientu, a les 09:15 h., va ser llamáu a declarar énte’l xulgáu, Samuel Fernández, trabayador de la empresa Tenneco Automotive (Monroe) y Secretariu Xeneral de la CSI, imputáu nuna causa por delitos de daños a les cámares de seguridá de la factoría, que fueron instalaes per tola planta.

Samuel Fernández ye, xunto otros miembros del Comité d’Empresa, ún de los voceros escoyíos pola Asamblea, pa representar a los y les trabayadores en toles conversaciones y negociaciones cola empresa y les instituciones.

Nesi sen, dende la CSI camenten qu’estes acusaciones son "una maniobra indecente de la empresa, que namás pretende, per un lláu, desviar l’atención del braeru problema, que nun ye otru que’l pieslle xabaz, ensin xustificación dalguna, de la factoría Tenneco y el despidu de tola so plantía y, pel otru, criminalizar a quienes se tornen nuna torga pa los sos planes".

Por too ello, dende la CSI llamen a participación na concentración de sofitu convocada pa mañana miércoles 11 d’avientu, a les 09:15 h., nel Palaciu Xusticia de Xixón.