Sofitu al derechu a decidir de Catalunya

20 de avientu de 2013 DE 2013 • Glayiu

Cinco organizaciones polítiques asturianes asoleyan un comunicáu nel que sofiten el drechu d’autodetermín de Catalunya. "Defender el derechu d’autodeterminación de Catalunya ye, tamién, defender un Camín p’Asturies distintu al de la sumisión al gobiernu estatal, la falta de competencies, la corrupción, l’aculturización y la falta de derechos democráticos."

DECLARACIÓN DE SOFITU AL DERECHU A DECIDIR DE CATALUNYA

El pueblu catalán da un pasu mas na so xusta reclamación sobre’l derechu democráticu a decidir el futuru de so. Y, darréu, la España reaccionario que nun entiende de derechos nin de democracia, sal en barrena pa dexar nidio que nun va permitir daqué tan elemental como la cellebración d’una consulta democrática. Los qu’argumenten que la "soberanía reside nel Pueblu español", son los mesmos que se doblen delantre los mandatos del gran capital financiero y de la Troika, los mesmos que mos roben, mos faen probes, mos reprimen, los que mos arrampuñen derechos sociales y civiles conquistaos con munchos años de llucha, sufrimientu y sangre.

Pero esti exerciciu de soberanía aniciáu pol pueblu de Catalunya nun pue sirvir a la derecha que representa Artur Mas p’afondar nes polítiques de recortes y d’expropiaciones sobre los bienes comunes. La soberanía ye un derechu que los pueblos tienen qu’exercer sobre TOLES decisiones polítiques, sobre’l propiu cuerpu, sobre les polítiques sociales y económiques, sobre la sostenibilidá ecolóxico del modelu productivu y de consumu, etc. Esto ye, el derechu a decidir de los pueblos tien que se realizar dende una radicalización de la democracia y, poro, tien que se llevar a cabu como oposición a les imposiciones del gran capital sobre los derechos y conquistes sociales.

Defender el derechu d’autodeterminación de Catalunya ye, tamién, defender un Camín p’Asturies distintu al de la sumisión al gobiernu estatal, la falta de competencies, la corrupción, l’aculturización y la falta de derechos democráticos. Ye, en definitiva, defender la soberanía y, con ello, el derechu a l’autodeterminación d’Asturies y la vía que pue apurrir un futuru al pueblu asturiano acullá de lo que güei atopamos: paru, precariedá, emigración y represión.

El Réxime surdíu de la transición y la so Constitución del 78 reciben un importante güelpe. Tócamos agora, a l@s de baxo, esixir tamién que les naciones y comunidaes del restu del Estáu Español queden llibres de probeza y de paru, de recortes y desafiucios, llibres de banqueros lladrones y de políticos corruptos, llibres de fame y represión. Faigamos bona aquella estrofa de la canción del gran Lluis Llach que dicía: "Si jo l’estiro fort per aquí / i tu l’estires fort per allà / segur que tomba, tomba, tomba / i ens podrem alliberar".

Firmen: Compromisu por Asturies, Conceyu Abiertu, Izquierda Anticapitalista Asturies, Izquierda Asturiana, Andecha Astur