Sobre la unidá d’aición na izquierda nacional asturiana

7 de marzu de 2013 DE 2013 • Xosé A. González

Fai unos díes, atopé na rede una convocatoria interesante que la izquierda soberanista gallega entamaba y que tuvo la so cellebración esti pasáu domingu. Yera una manifestación conxunta onde tol soberanismu progresista del país vecín convocaba al so Pueblu. Organizaciones polítiques, sindicales, xuveniles, estudiantiles o culturales convocaben esta manifestación, que vino precedía d’una riestra de concentraciones por estremaes llocalidaes de Galicia. Estes organizaciones como digo, que trabayaben n’estremaos ámbitos, comparten ente elles la defensa de Galicia como realidá nacional y presupuestos ideolóxicos y políticu d’izquierda, en mayor o menor grau.

Prestóme la convocatoria de la que toi falando, nun pueo dicir otra cosa. Paecióme atractiva, aglutinadora y con un mensaxe afayaizu, radical y coherente pero ensín cayer en mensaxes dogmáticos y máximalistes. El llema yera “ Pol drechu al trabayu, a la igualdá, a los servicios públicos y a la plena soberanía nacional gallega” y llamaben a construyir “un procesu constituyente y de ruptura democrática”. La convocatoria tresmitía que los convocantes taben fartos yá de corrupción y desaniciu económicu y cultura. Esi yera’l mensaxe de la manifestación y les concentraciones previes que fixeron por tol país gallegu estes organizaciones, d’una forma conxunta.

Nun voi entrar nel resultáu de la manifestación, como movilización, polo que pudi ver, foi un ésitu relativu, al igual que les concentraciones qu’hebo por toa Galicia, coles que los organizadores fueron “caleciendo l’ambiente”. Nun dexa de ser un pasu alantre. En Galicia, la izquierda nacional llevaba muncho tiempu d’atomización y de fechu anguaño ésta ye considerable entá. D’otra miente, la crisis interna’l BNG y la so dixebra foron cuestiones que nun podemos dexar de llau pa falar del ambiente que se tien de vivir nel soberanismu gallegu.

Pesie a complicaciones evidentes, dixebres y l’atomización propia d’un movimientu políticu que ta en construción, la izquierda soberanista gallega algamó sacar a la cai a la so bas social en Santiago de Compostela el pasáu domingu d’una forma conxunta. Nun conozo cómo foi esti procesu d’unidá d’aición nel soberanismu gallegu nin camiento que vaiga a determinar siquier un puntu d’inflexión, pero personalmente llamóme l’atención y paecióme una forma de trabayar perafayaiza.

Tornando al país de nueso nun sedré yo quien quiera acudir a mimetismos. De fechu camiento qu’un de los grandes erros hestóricos de la izquierda nacional asturiana foi abusar de mimetismos simplayos, faciendo propios mensaxes y estratexes que n’otros países daben resultaos medianamente decentes ensín cuasi adautar esa praxis y esi conteníu al contextu y la situación social d’Asturies. Quiero dicir, soi de los que piensen qu’un de los motivos que despliquen el fracasu del soberanismu n’Asturies foi querer abusar del mimetismu, munches vegaes entendiendo mal lo que ye l’internacionalismu o aplicando principios xenerales y universales nel país ensín enantes faer un analis sociolóxicu y posáu p’adautar precisamente determinaes postures y posiciones que pueden ser universales, pero qu’en cada contextu presenten particularidaes.

un de los grandes erros hestóricos de la izquierda nacional asturiana foi abusar de mimetismos simplayos, faciendo propios mensaxes y estratexes que n’otros países daben resultaos medianamente decentes ensín cuasi adautar esa praxis y esi conteníu al contextu y la situación social d’Asturies

Lo que ye ciertu ye que la convocatoria de les organizaciones gallegues espertóme la curiosidá pero tamién una d’eses cualidaes tan propies del ser humanu, la comparanza. Non nel sen de compariar sinon más bien d’entrugame a mí mesmu porque n’Asturies nun se dan esti tipu de convocatories conxuntes. Nun voi dicir nada nuevo al afirma que nel soberanismu asturianu l’atomización ye una carauterística clave y qu’esa atomización prevocó y prevoca un desánimu xeneralizáu pente les persones averaes a esti movimientu políticu que tien como resultáu que la mayoría de la xente abandonara’l tren. Nun creo que podamos falar na izquierda nacional asturiana d’una rede de bas social como sí podemos afirmar nel casu gallegu, pero precisamente una de les causes d’esa falta de bas social camiento que ye l’ausencia de trabayu militante, lo que nun puede entendese ensín cuntar colo qu’acabo dicir, la cantidá de xente que coló pa casa “quemada”.
Bien ye ciertu, que en Galicia el nacionalismu d’izquierda ye dalgo con una fuercia abonda como pa falar d’un movimientu políticu hestóricu y que cunta con un sofitu social significativu dientru la sociedá gallega. Tamién ye ciertu que en Galicia si que podemos falar d’una importante bas social y una permanente dinamización sociopolítica desendolcada por esa mesma bas social, pesie a atomizaciones y tamién traiciones. Son contextos bien diferenciaos, si, anque seyamos países vecinos. Pero esta movilización de la que tanto falé enantes foi llevada alantre pesie a compartir ellos munchos de los males que vive’l nuesu “movimientín” sociopolíticu.

Asturies s’alcuentra nuna situación llaceriosa. Vivimos una crisis permanente dende hai décades y la situación de crisis mundial y cayía del capitalismu va xenerar entá más dificultaes y problemes a curtiu-mediu plazu. La corrupción y el clientelismu son cuestiones cuasi yá asentaes con normalidá n’Asturies gracies a los de siempres, agora representaos por Javier Fdez y los sos collacios, incluyíos los collacios que dicen ser “oposición”. El nivel de desemplegu ye alloriante, sobre manera’l xuvenil. La emigración forciada yá nun s’escuende, agora de fechu anímase a la mocedá a emprender esi camín, lo que ye tovía más ofensivu qu’aquello de la “lleenda urbana”. El desaniciu cultural y llingüísticu sigue imparable cola completa implicación de tolos axentes sociales y políticas con cuotes de poder representatives. En resume, nun tenemos futuru como país a un nivel cultural, políticu y socioeconómicu.

Con esti panorama cualesquier pensaría que la izquierda asturiana ta na cai día si día tamién y que dicir del nacionalismu o soberanismu d’esti país. Pero ciertamente, tenemos lo que nos merecemos. Ye cuasi una rareza que les organizaciones soberanistes asturianes convoquen actos, por modestos qu’estos seyan. Da la sensación qu’anguaño namái dedicámonos a siguir a los que garren la iniciativa y se mueven, y amás d’una forma munches vegaes mui vergoñosa, entendiendo con esto que nos da vergoña visibilizanos, cayendo nel marxinalismu. Con esta situación, nun fai falta falar de les rempuestes qu’hai a nivel xunitariu pa tornar la situación del país, o nun fai falta dicir muncho, con dicir que dende esti movimientu políticu nun hai nenguna val.

Pues bien, la convocatoria qu’enantes citaba xiraba en torno a unos exes bien claros y cenciellos: combatir el paru, la corrupción y el desaniciu cultural y económicu y al empar defender los servicios públicos, la igualdá y la soberanía nacional gallega. Nun son, tal como tan les coses, maximalismos nin muncho menos. N’Asturies tamién sofrimos el paru, la corrupción y desaniciu cultural y económicu. Vaya que si sofrimos d’esto. Y tamién, los soberanistes asturianos puxamos por defender los servicios públicos y la igualdá social. Y naide n’Asturies va escandalizase si falamos de que necesitamos soberanía p’aparar les imposiciones neolliberales del Estáu y la Europa del capital. Nun creo que naide quedara alloriáu por visualizar n’Asturies esos mensaxes.

N’Asturies tamién sofrimos el paru, la corrupción y desaniciu cultural y económicu. Y tamién, los soberanistes asturianos puxamos por defender los servicios públicos y la igualdá social. Y naide n’Asturies va escandalizase si falamos de que necesitamos soberanía p’aparar les imposiciones neolliberales del Estáu y la Europa del capital. ¿Sedrá tan complicáu faer dalgo equí asemeyáu a lo que fixeron los soberanistes en Galicia estes últimes selmanes? ¿Sedrá tan difícil convocar una manifestación los coleutivos soberanistes nos ámbitos políticos, sociales, sindicales, xuveniles o culturales?

De toles formes, como yá dixi enantes, nun soi collaciu, lóxicamente, del mimetismu simplayu. A lo menos nun quiero selo. Poro, entiendo que n’Asturies hemos de ser más pedagóxicos ya intelixentes colos mensaxes cuando éstos surden dende la izquierda nacional. El motivu nun ye otru que’l nivel de confianza, receptividá y entendimiento que vamos atopar na sociedá asturiano nesti momentu va ser perbaxu. De toles formes, hemos de salir del cascarón d’una vez y que se mos vea, por que yá ta bien d’apatía, desánimu y mal facer. La llamada “transición” foi una oportunidá que’l nacionalismu asturianu nun foi quien a aprovechar p’asentar nel país una bas social comprometía cola soberanía del país y la llucha pola tresformación social. Esta crisis va dir pa llargu y el momentu de dinamización y “efervescencia social” hai qu’aprovechalo p’apaecer y proponer al Pueblu Asturianu, mui quemáu y siempre en brenga, una alternativa asturiana y anticapitalista qu’acabe cola podredumbre d’anguañu. Hemos de facelo.

Pues digo yo. ¿Sedrá tan complicáu faer dalgo equí asemeyáu a lo que fixeron los soberanistes en Galicia estes últimes selmanes? ¿Sedrá tan difícil convocar una manifestación los coleutivos soberanistes nos ámbitos políticos, sociales, sindicales, xuveniles o culturales? Nun digo que salgamos a la cai d’esa forma nin con esi mensaxe calcáu, pero defender agora lo mesmu la igualdá social, el seutor públicu y puxar pol nuesu desendolcu cultural son coses que compartimos toes y toos. Combatir el paru y l’esmantelamientu industrial d’Asturies tamién son puntos d’alcuentru claros. Tirase a la cai contra la corrupción y el desaniciu d’Asturies son puntos aseguraos de confluyencia. Munchos dirán qu’eso yá lo faen munchos coleutivos y toi d’alcuerdu. De fechu hemos de tar ehí tamién y valorar el llabor d’esos movimientos. Pero llegará’l día en que tengamos qu’enfrentar esta crisis permanente que sofre Asturies y esti capitalismu cola nuesa propuesta na cai, presentando la soberanía política y económica d’Asturies como ferramienta de construción d’un país meyor, más prósperu, llibre ya igualitariu. Y eso nun podemos facelo d’otra forma qu’a comuña, entendiendo qu’anguaño n’Asturies nun tenemos nengún referente sociopolíticu importante nel soberanismu nin nengún movimientu de mases.

Soi consciente que lo qu’esti artículu plantega ye perdificil y de xuru qu’en dalguna cuestión taré enquivocáu o tendré un enfoque dalgo idealista pero tamién creo qu’Asturies necesita nesti momentu una rempuesta d’esti calter. La izquierda nacional asturiana lleva esistiendo más de trenta años y muncha xente igual piensa que la xente yá fartucó de los nacionaliegos de siempres, pero yo pienso qu’entá nun fuimos quien a visibilizanos y a presentanos como dalgo fresco y nuevu. Nun creo qu’en xeneral tuvieremos la oportunidá de fartucar y cansar al Pueblu Asturianu. Igual nesti momentu tenemos una oportunidá.