Sobre la solidaridá con Palestina

El CSCA Asturies refuga rotundamente la instrumentalización fecha por neofacistes

22 de avientu de 2012 DE 2012 • Glayiu

El Comité de Solidaridá cola Causa Árabe d’Asturies refuga rotundamente "la utilización de la solidaridá con Palestina pa espardir doctrines racistes y nazi-facistes". La llista de corréu d’una organización que puxa pol derechu al retornu de la diáspora nun s’esmolez pola presencia de conteníos antisemites. El neofacismu tiende a colar el so mensaxe antisemita y racista nel movimientu propalestín. Mesmamente güei tuvo llugar n’Uviéu un actu de dellos grupúsculos ultraderechistes llamando a sofitar la causa palestina.

Nun comunicáu que mos apurre güei el CSCA n’Asturies, la organización propalestina manifiesta "públicamente’l nuestru más fonderu rechazu a les manifestaciones racistes, antisemites y neonazis que vienen apaeciendo dafechu dende hai unos meses nos mensaxes que circulen ente particulares y organizaciones suscrites a la llista de corréu nel Estáu español de la coalición palestina por el Retorno Al-Awda, iniciativa internacional d’orixe estadoxunidense de vindicación del derechu al retornu de los refuxaos palestinos.
El CSCA manifiesta que magar que comunicó a los alministradores de la llista tales fechos condenables, estos nun ficieron res por iguar la presencia d’antisemites nella. Poro, faen un llamáu a toles organizaciones del Estáu "pa que seyan intransixentes con quienes abellugándose na solidaridá con Palestina llancen conteníos racistes, reaccionarios y nazi-facistes".
Mesmamente, esta tarde n’Uviéu dellos grupúsculos ultraderechistes entamaron un actu que convocó a una treintena de persones "pola lliberación de Palestina". El neofacismu pretende antroxar davezu el so antisemitismu baxo la careta de la solidaridá colos pueblos que faen frente al sionismu, como son los casos de Palestina o Irán.