RTPA estrena l’añu despidiendo a quienes tenía que reincorporar

Suspendíes varies subcontrates y despidíos los trabayadores a los que por sentencia xudicial tenía que reincorporar

3 de xineru de 2013 DE 2013 • Glayiu

La Radiotelevisión Pública del Principáu d’Asturies (RTPA) estrenaba 2013 despidiendo a 23 de los trabayadores que tien que reintegrar na so plantilla obligada por otres tantes sentencies xudiciales. A estos despidíos hai que sumar los más de 40 puestos de trabayu perdíos al non renovar les subcontrates que RTPA tenía venceyaes a los informativos de radio y televisión, y con trabayadores cedíos illegalmente al ente públicu.

La cuestionable cadarma llaboral de la RTPA quedó n’evidencia una vegada más el día de fin d’añu. El 31 de xineru aconceyaba de manera estraordinaria el so conseyu d’alministración. Sobre la mesa dos puntos: la reincorporación de los trabayadores cedíos illegalmente a empreses subcontrataes, y la renovación de les subcontrates que faen los servicios informativos tanto de la radio como de la televisión.
Al primer asuntu diéron-y carpetazu cola non renovación de les subcontrates Margen, Media 4, El Comercio, Tenconten y Enfoque, colo que alrodiu 40 trabayadores enteráronse in situ qu’al día siguiente nun diben tener trabayu. Quítabase asina la cadena pública del pesu de tener concesiones irregulares dafechu, con empreses rellacionaes con casos de corrupción, sobre les que Foro, que cuenta con 4 asientos nel conseyu rector del ente, menació con llevar a los tribunales. Dase’l fechu de que munchos d’esa cuarentena de trabayadores tienen denunciao y ganao xudicialmente a RTPA por cesión illegal de trabayadores, y tán a la espera de la so reincorporación al ente públicu, lluéu de la esperable ratificación del Tribunal Superior de Xusticia d’Asturies, d’equí a unos pocos meses.
Sicasí, el conseyu d’alministración de la RTPA tamién vien de decidir el despidu ya indemnización de, hasta la fecha, 23 trabayadores a los que por sentencia había reincorporar a la so plantilla.
Como vien siendo vezu, nos noticieros tanto de la televisión como de la radio nun dixeron res d’estos dos conflictos llaborales en tres díes, magar l’esmolecimientu de Javier Fernández, másimu responsable del ente públicu entantu que presidente del Principáu, "pol empléu n’Asturies" sigún dixo nel so discursu de fin d’añu.