Rises solidaries col pueblu palestín

19 de xineru de 2013 DE 2013 • Glayiu

El teatru Filarmónica d’Uviéu acoyó ayeri la Gala Festiclown y Pallasos en rebeldia, un circu pa la paz en Palestina. Amás de Leo Bassi, tomaron parte los artistes asturianos Maxi Rodríguez, Alberto Rodriguez, Paraninfu 58, La Texedora de Suaños y El Perro Flaco. El Comité de Solidaridá cola Causa Árabe d’Asturies organizó esti actu nel que tolos artistes participaron de manera desinteresada.

L’actu entamao pol Comité de Solidaridá cola Causa Arabe d’Asturies tenía l’oxetivu non solo d’amosar la solidaridá y sofitu al pueblu palestín, sinón tambien de percanciar fondos pa poder faer realidá’l proyectu d’una caravana de payasos a Gaza en 2013.

Pallasos en Rebeldía que se autodefine "como un espaciu de solidaridá internacional y fraternidá ente los pueblos que s’espresa al traviés de la risa y l’arte coles mires de trabayar pa compartir esperances y suaños en llugares del mundu que viven so los conflictos militares y les inxusticies del actual sistema". El so trabayu en Palestina empieza nel 2004, y dende entós delles caravanes de payasxs con actuaciones, talleres de risoterapia y clown, malabares, acrobacies, etc son parte del trabayu que vienen realizando nos territorios palestinos. En septiembre de 2011 entamaron el 1º festival de payasos del mundu árabe, el Festiclown Palestina, mientres 15 díes, con 40 persoas movíes a les 3 ciudaes onde tuvo llugar: Nablus, Xerusalem y Ramallah.

Na prensa asturiana podíamos lleer estos dias declaraciones de Lleo Bassi nes qu’aseguraba que "con rises se pueden faer dos cuesas, per un sitiu camudar por un intre la vida d’unos neños que tán nun pequenu territoriu arrodiáu de murios, metralletes y helicópteros apuntando escontra ellos. De los neños y de les sos madres, que nun tán acostumaes a ve-yos rir. Y, por otru, podemos amosar a los israelinos que la so política d’agresión nun ye válida."

Mohamed Saffa, médicu palestín criau na diáspora y activista del CSCA, garró el micrófonu pa falar a los presentes: "Güei tais equí respondiendo a la nuestra llamada a la solidaridá con Palestina. Pero yo nun puedo namás falar de la nuestra tragedia. Dixe que la solidaridá ye humana y universal, y yo soi parte de vosotros, vivo esta situación y esta crisis. Poro, quiero alzar la mio voz solidaria colos seis millones de persones que tán en paro; cola asociación Stop Desahucios, que lluchen escontra una llei tan inxusta como inhumana. Nun podemos dexanos marxinar por una crisis amplia. Nun podemos aceptar realidá como un destín. Los negros nun podíen aceptar que’l so destín yera ser esclavos tola so vida, y nun fai tantu tiempu d’ello. La humanidá fue capaz de ganar esa batalla contra la esclavitú. Güei mos corresponde ganar la batalla contra la ocupación. Ye la nuestra llucha y el nuestru compromisu. Yo soi un palestín; emigré de la mio tierra. Cada vez que marché, Palestina marchó conmigo; cada vez qu’espoxigué, espoxigó Palestina dientro de mi. Sigo teniendo’l mio suaño, y gracies por compartir esi suaño güei conmigo. La llibertá. Munches gracies".