Requerimientos en caúna de les conseyeríes pa que cumplan cola toponimía

12 de febreru de 2014 DE 2014 • Glayiu

Esti llunes 10 de febreru la Xunta pola Defensa de la Llingua Asturiana (XDLA) presentó nel Rexistu Xeneral Central del Principáu d’Asturies requerimientos formales instando a caúna de les conseyeríes a que cumplan la llegalidá en materia toponímica nos sos respectivos ámbitos competenciales.

La Xunta pola Defensa de la Llingua Asturiana (XDLA) presentó nel Rexistu Xeneral Central del Principáu d’Asturies requerimientos formales instando a les Conseyeríes d’Agroganadería y Recursos Autóctonos, de Bienestar Social y Vivienda, d’Economía y Empléu, d’Educación, Cultura y Deporte, de Facienda y Sector Públicu, de Fomentu,
Ordenación del Territoriu y Mediu Ambiente y de Sanidá a que cumplan la llegalidá en materia toponímica nos sos respectivos ámbitos competenciales. Con estos requerimientos dase continuidá al procesu entamáu’l 31 de xineru pasáu col escritu dirixíu a la Conseyería de Presidencia en calidá de coordinadora de los asuntos de toles conseyeríes.

Nos escritos de la XDLA, recuérdase que la Llei d’Usu y Promoción del Asturianu, aprobada’l 28 de marzu de 1998, recueye nel so artículu 15, Capítulu V, que <>. Un decretu posterior, del 4 d’abril del 2002, regula la Xunta Asesora de Toponimia del Principáu d’Asturies, y otru del 18 de xunetu d’esi añu, establez el, procedimientu de recuperación y fixación de la toponimia asturiana.
L’artículu 5.2 d’esti decretu diz qu’a partir del momentu de la entrada en vigor del Decretu pol que se determinen los topónimos correspondientes, les denominaciones o topónimos que nél se recueyan tendrán la consideración de denominaciones oficiales. Cumpliendo estes normes aprobáronse yá ente’l 2007 y el 2012 50 decretos cola denominación oficial de los topónimos d’otros tantos conceyos.

La XDLA denuncia nos requerimientos qu’en cuasi tola documentación xenerao dende les conseyeríes del Principáu d’Asturies nun s’utiliza’l nome oficial na so forma tradicional, inclumpliéndose polo tanto la llexislación y vulnerándose’l principiu de llegalidá consagráu nos artículos 9 y 103 de la Constitución Española de 1978, ún de los principios fundamentales d’un Estáu de Derechu.

Amás, nel casu de la toponimia, l’actuación de l’Alministración nun requier tomar más midíes que la del so propiu cumplimientu. Argumentos como’l de la gradualidá de l’aplicación de la norma, les más de les veces cola sida de la escasez de recursos, podríen entendese, siempre con unos plazos razonables, pa la renovación de lletreros de carretera y mapes, pero nunca pal so usu normal nos escritos que l’Alministración produz a diario. Hai que recordar qu’hai topónimos que son oficiales dende hai siete años y el Gobiernu asturianu, el mesmu que los oficializó, nun los usa.

La XDLA esixe de l’Alministración del Principáu d’Asturies l’adopción de les midies necesaries pa correxir esta situación porque nos alcontramos <>. Pídese, polo tanto, qu’en tola documentación que se xenere se cumpla estrictamente la llegalidá toponímica.

Nos requerimientos, la XDLA pon como muestra resoluciones o anuncios publicaos nel BOPA no que va d’añu qu’incumplen la llegalidá toponímica.

En casu de que nun se dea respuesta al requerimientu, la XDLA valora la posibilidá d’impugnar de manera individualizada cualquier tipu de procedimientu alministrativu procedente de cualquiera de los organismos del Principáu d’Asturies qu’incumplan les formes toponímiques oficiales aprobaes pol mesmu Principáu.