Repensando teoríes dende la práutica

31 de avientu de 2012 DE 2012 • Pablo M. Testa

Hebo un tiempu nel que l’espaciu yera abiertu. Abiertu y llibre. A disposición de quien fuere. El so usu; l’esfrute del espaciu. Tiempu dempués esi mesmu espaciu alquirió otra consideranza. En resultancia de l’apaición de l’agriculura como mediu de sobreviviencia, como mediu productivu, esi espaciu en concretu alquirió una propiedá: un xacíu de propiedá. Podríemos talantar, que daquella, nesi primer momentu, la esplotación podría ser comunal. Sicasí, lo cierto ye que la construición “particular” d’edificios, l’apaición d’otros espacios nuevos, y la xestión y alministración d’eses esplotaciones agraries y ganaderes, supunxo la espropiación d’esos espacios al común. Por embargu, ainda, quedaba la posibilidá de que ciertos espacios nun fueren de naide, siendo a la so vegada de toos. Un prau cualquier, una oriella d’un ríu, un sablón... Pero sieglos dempués... foi recayendo, migayu a migayu, l’alministración d’esos espacios abiertos -y de los zarraos-, n’instituciones ya/o individuos que finaben siendo los xúnicos propietarios, xestores o alministradores, acutando l’usu y esfrute d’un llugar determináu. Por toos ye sabío.

Somos herederos d’esi procesu d’acaparación del espaciu por unos pocos. L’espaciu como tal ye imprescindible, ca son los llugares au nós desendolcamos la nuesa actividá vital. Nun tenemos por qué tar suxetos a ún determináu, pero’l propiu acutamientu d’esos mesmos espacios fai que seyamos suxetos concretos d’esos espacios predefiníos por axentes ayenos a nós. L’alministración, la propiedá d’ellos, faciendo fincapié nos que se produz dalguna cosa, nos que mos curamos, nos que mos educamos, nos que mos rellacionamos, nos qu’alquirimos bienes, etc, llinda a la fin la disponibilidá de satisfacer les nueses necesidaes básiques. Seyan estes necesidaes, fisiolóxiques, sicolóxiques o, llamémoslo, creyatives.

¿Cuál ye la clave, estratéxica, si se quier, d’emancipación? La mayoría de movimientos retrucaría: “La toma los medios de produción”. Talantamos igual... en parte.

Partiendo la problemática del espaciu, vémonos empuestos a recuperar esos espacios perdíos. Y analizamos el nuesu contestu. Sentimos como necesidá imperiosa la llegada’l nuesu empoderamientu, como persones individuales y como comunidá d’elles. Sentimos la necesidá d’afayar la forma d’algamalo y al facelo recurrimos, como ye normal, a aquellos pensamientos o teoríes que mos apurren preseos p’alitar a elli. Equí vemos, nós, una torga interesante. Los contestos, pesie a qu’esistan situaciones similares, nun son iguales. Y achisbamos: ¿Cuál ye la clave, estratéxica, si se quier, d’emancipación? La mayoría de movimientos retrucaría: “La toma los medios de produción”. Talantamos igual... en parte. Sicasí prestáríamos facer una posa equí y analizar por qué se dio esa “solución” y por qué s’aceutó nesos momentos determinaos:

• Esistía na denomada clas trabayadora una afeición nidia dica’l puestu trabayu. Por riegla xeneral un trabayador llaboraba nun mesmu oficiu dende la so adolescencia fasta la so xubilación. Esistía un sentimientu de pertenencia.
• La mayoría la población taba ocupada, fuere de forma continua o discontinua (exemplu de braceros, xornaleros o campesinos).
• Los espacios “abandonaos”, en “desusu”, etc. yeren los menos, salvo tarrenos qu’en dómines de coleutivización yeren lliberaos poles xentes del campu.
• La mayoría trabayaba n’estayes esclusivamente produtives.

¿Por qué creyemos que ye abegosa la idea de seguir plantegando nel nuesu contestu como “xúnica” retruca a les nueses ganes de ser llibres y naguar por un mundiu meyor, la “toma los medios de produción”?

• Les calterístiques de les persones que trabayen anguaño ye d’itinerancia. Poco xente trabaya tola vida nun mesmu llugar y el sentimientu d’afeición ye raro. Esiste gran dinamismu nos puestos de trabayu. Trabayes dos díes en tal sitiu, cuatro años n’otru y cinco tas desemplegáu.
• Esiste un númberu de población xeneral desemplegada descomanáu.
• Los espacios abandonaos, en desusu, etc. ye ablucante. Tanto en vivienda como en tarrenos y espacios edificaos.
• La mayoría nun trabaya n’estayes produtives.

Conclusión a la qu’alitemos entós:

Creyemos que ye necesario recuperar los espacios usurpaos a lo llargo la hestoria; creyar los medios de produción dende los espacios en desusu y abandonaos, dando prioridá a los xestionaos pol ente públicu o propiedá d’empreses, individuos o entidaes que nun respeten los intereses xenerales del común. Esta Paraestrutura produtiva y creyativa, tien l’enfotu de dar sostentu real y a comuña a aquelles persones qu’asina lo allampien, másime a aquelles persones que tan anguaño en situación de desemplegu. Creyemos que’l desendolcu d’esti procesu debe contemplar la forizontalidá pa gabitar qu’haiga una participación activa, o al menos que se dea la posibilidá de qu’ello surda; esto, al coyer concencia de participación de la so propia vida y de la del conxuntu, fomentará l’apaición d’una corresponsabilidá col entornu, yá que se participa na solución de les posibles torgues de forma direuta. Esto nos conducirá al nuesu empoderamientu. Nesti sen, apreciamos tres enquizos nidios que sostenten esti sistiema coses:

• L’actitú la persona ye Individualista, lo que xenera una estrutura organizativa llamada Sociedá que produz ciudadanos.

Escontra ello, s’apuesta por:

• Xenerar una actitú Cooperativa o Coleutiva que xenere una Comunidá y que con ello surdan persones y/o vecines llibres.

L’exemplu va surdiendo migayu a migayu. Ñaz una bisarma fecha por toos, pa toos y que fai, constrúi, creya, y nel so facer esfarrapa lo que mos oprime, reprime y coharta.
Pa nun allongar más esti compartir esperiencies ya idegues... Despídome fasta la prósima.