¿Renaz el municipalismu asturianu?

En Cuideiru los vecinos organicen una plataforma contra’l nombramientu a deu del nuevu alcalde, en Nava l’Ayuntamientu rexenera les xuntes vecinales como ferramienta de participación ciudadana; en Tapia y en Noreña les iniciatives ciudadanes tamién ganen terrén públicu

20 de febreru de 2013 DE 2013 • Glayiu

En Cuideiru dellos vecinos abrieron la caxa la truena porque’l nuevu alcalde nin siquiera diba nes llistes del partíu ganador de les últimes elleiciones; en Nava, l’Ayuntamientu afala la participación ciudadana desferruñando les xuntes vecinales; en Tapia l’apertura d’una mina d’oro a cielu abiertu llevó a movilizase a detractores y partidarios; en Noreña los vecinos plantáronse ante’l posible pieslle del centru de discapacitaos de la villa condal.

El casu más reciente ye’l de Cuideiru. Lluéu de la dimisión del alcalde vencedor de les últimes elleiciones municipales, el so partíu, el PSOE, decidió sustituyilu por Ignacio Fernández, militante socialista que nun figuraba na llista que resultó más votada. Ante lo que consideraben un "golpe directua la democracia", un grupu de vecinos decidió entamar un movimientu de protesta por esta decisión, llegal "pero non llexítima", en palabres de los promotores de la Plataforma pola Democracia en Cuideiru.

El pasáu domingu la Plataforma fizo la so presentación pública nel salón d’un restaurante de la villa marinera, ente una bona cantidá de vecines y vecinos. Cinco voceros tomaron la palabra nel actu. Samuel Fernández, Kiko Garay, Estefanía Torres, Jaime López y Pilar Martínez, quien entamó diciendo que "esta Plataforma pretende convertise nun espaciu físicu y real onde los vecinos y les vecines d’esti conceyu puedan esponer les sos crítiques a la política municipal, dende’l respetu y la tolerancia, eso sí, pero tamién y por supuesto, dende la firmeza, la serenidá y ensin miéu a posibles represalies".

JPEG - 266.1 KB

De secute Samuel Fernández fizo presentación de los representantes de la Plataforma, toos ellos vecinos y vecines de Cuideiru. Lluéu de Fernández garró la palabra la presidenta, Estefanía Torres. Nun discursu con cites al politólogu Juan Carlos Monedero, los clásicos griegos o al grupu de rap Los Chicos del Maiz, Torres rompió’l fuéu afirmando que "vivimos unos tiempos nos que los partíos políticos encargáronse d’amuesanos que la democracia ta tresformada en partidocracia. Una democracia que, como digo, pretenden matar a través de la interpretación tendenciosa de la llei. Una llei que, en tou casu, nun ha tar enxamás penrriba de la voluntá popular pues, como dixo Cicerón: ’la llei suprema ye’l bien del pueblu’. Cuideiru siempre fue un pueblu irreverente, decidíu y lluchador. Sin embargo, al final, siempre termina obedeciendo al poder. Pero esto ha y tien que cambiar. Aquellos conseyos de ’nun te metas en política’, ’la política ye mala’, o ’los políticos nun van facer por nosotr@s lo que nosotr@s nun queremos facer’ tán dinamitándose. Y lo faen porque bramente la política pertenez a la ciudadanía, y ye la ciudadanía la que ha ser la protagonista. Pa consiguilo, pues, tenemos qu’armar les nuestres converxencies y dir pensando ensin priesa nel lema que venimos repitiendo les últimes selmanes: “Nun vamos despacio, ye que vamos mui lloñe".
Non sólo en Cuideiru ta pasando algo asina, en Noreña, en Tapia de Casariego, en Mieres, en Villaviciosa y n’otros tantos conceyos d’Asturies, tán surdiendo movimientos d’esti tipu. Ye verdá, les marees son importantes. Sin embargo, nun van valir de muncho hasta que se conviertan en tsunamis".
Peslló l’actu Kiko Garay qu’emplazó a la primera iniciativa de la Plataforma: cellebrar un conceyu abiertu nun edificiu públicu de la villa pa conocer el parecer de la mayor cantidá de vecines y vecinos posible.