Reacciones ante l’absurdu espectaculo de persecución llinguística en Mieres

11 de payares de 2013 DE 2013 • Glayiu

L’abusu manifiestu d’un policía llocal de Mieres que multó a un trabayador de la Casa la Cultura por "nun entender" la frase n’asturianu "Autorización Aparcamientu" desamarra reacciones de distintos coleutivos y partios políticos.

Conceyu Abiertu por Mieres convocó una concentración esti sábadu delantre la Casa Conceyu de Mieres, pa denunciar la represión llingüística exercía nel conceyu pola Policía Llocal, que según denunciaron "viola los drechos de les persones asturfalantes con total impunidá".

Compromisu por Asturies considerada “fondamente llamentable que’l gobiernu municipal de Mieres d’Izquierda Xunida, nes sos guerres internes cola Policía Local, nun defenda los derechos de los asturfalantes, dando validez a argumentos caprichosos, autoritarios y totalmente fuera de la llegalidá”.

Por otru llau dende La Xunta pola Defensa de la Llingua Asturiana (XDLA) tamién denunciarón "esta escalada nel absurdu total y, como consecuencia, na persecución de los derechos de la ciudadanía. Naide con dos deos de frente pue pensar que se trate d’un problema d’entender o non l’autorización porque tea redactada n’asturianu. El problema ye que servidores públicos niéguense a aceptar como normal la llingua qu’usa la población de Mieres a la que sirven. Cola sida de que l’asturianu nun ye oficial, ponen per delantre eses comenencies llegalistes antes que ser tolerantes y tener bona voluntá. ¿Nun entienden l’autorización o nun la quieren entender? ¿Son illegales agora tolos ciudadanos de Mieres y van quedar nuna situación d’inseguranza y desprotección xurídica? ¿Multarán a los ciudadanos que falen cola policía local por nun los entender?

Dende Andecha Astur pronunciáronse sobre estos fechos afitando que "un Ayuntamientu d’IU, formación política que diz respetar los drechos llingüísticos de los asturianos, sofite un nueu casu de represión llingüística comu l’acabante d’aportar en Mieres, retirando les autorizaciones n’asturianu que la Casa de Cultura de Conceyu emplegaba p’autorizar l’estacionamientu frente al citáu centru, ye una espresión más de comu la represión llingüística nun ye solo sistemática ya indiscriminada, sinon de comu IU ye una parte más d’esi entramáu represivu".

L’Asociación Cultural N’Ast considera que "por desgracia, situaciones tan esperpéntiques como l’asocedía nel conceyu mineru son bastante más habituales de lo que pueda paecer, por eso dende N’AST perafitámonos na nuesa reivindicación d’oficialidá pal asturianu, una oficialidá que torgue estes situaciones y qu’ampare los drechos llingüísticos del pueblu asturianu. Amás, nesti casu concretu de Mieres, N’Ast camienta que l’argumentación de que les tarxetes autorizaes d’aparcamientu resultaben incomprensibles arreciende abondo a represión pura y dura, más qu’a un problema d’entendimientu real. Poro, queremos pidir públicamente al Ayuntamientu Mieres que xixile esti tipu d’actitudes de la Policia Llocal, qu’ensin dulda constitúin un nidiu exemplu d’estrallimitación nes sos funciones", señalen dende l’asociación.

Campaña de recoyida de firmes:
https://www.change.org/es/peticiones/reestablecimientu-de-les-autorizaciones-d-aparcamientu-n-asturianu