Reacciones a la violencia policial del 14P

Los sindicatos minoritarios denuncien en rueda prensa l’asaltu a la Casa Sindical

16 de payares de 2012 DE 2012 • Glayiu

Voceros de los sindicatos convocantes de la manifestación del 14 payares en Xixón, CSI, CGT y CNT, denunciaron la inusitada violencia de les policíes Nacional y Municipal durante la fuelga xeneral. El secretariu de la CSI, a la que pertenecen tres de los cuatro deteníos nel 14P, desixó la dimisión tanto del delegáu del Gobiernu n’Asturies como de l’alcaldesa de Xixón por ser los responsables respectivos de los dos cuerpos policiales.

N’Asturies hubo otra detención en Uxo, en presunta rellación col corte de l’autovía A-66 a l’altura de la villa ayerana. El deteníu fue puestu en llibertá con cargos depués de prestar declaración nos xulgaos de Mieres.
En tol Estáu los deteníos fueron 110. Destaca pola gravedá de les acusaciones, la detención de dos mozos en Vallecas, a los qu’imputen posesión d’un artefactu esplosivu. Sicasí, los presentes dan informaciones bien nidios de los fechos, y podía tratase d’un amañu policial.

Jorge Muñiz, secretariu de la CGT de Xixón, denunció que los mandos policiales "teníen orden de facer suya la cai, ensin importar que nun hubiere nengún actu de violencia, nengún destrozu, nin nengún altercáu". Samuel Fernández, secretariu xeneral de la Corriente Sindical d’Izquierda, recalcó la inesistencia de motivos que pudieren xustificar la violencia policial, poro, solicitó la dimisión del Delegáu del Gobiernu y l’Alcaldesa de Xixón, responsables de les unidaes d’UIP qu’irrumpieron na Casa Sindical, y de la Policía Municipal qu’acosó y detuvo a tres trabayadores na Plaza L’Humedal. Avanzó tamién que los sindicatos van interponer una querella criminal contra ambes policíes pola so actuación na xornada de paro xeneral. "Enantes de qu’acabe’l mes d’avientu tendremos en Xixón una rempuesta a esta represión" dixo pa terminar.
Hector Augusto González, voceru de la CNT, amuesó la solidaridá del so sindicato pa colos deteníos, destacó el papel de "rompefuelgues que xugó la Policía" nel 14P, y condenó particularmente l’asaltu a la Casa SIndical "algo qu’algunos na nuestra inxenuidá creíemos yá superaos nesta supuesta democracia". Insistió na inocencia de los cuatro deteníos: "esos trabayadores nun ficieron ná; salir de piquete informativu ye nun facer ná, por muncho que se los criminalice dende la caverna mediática", afirmó González.

Videu de la rueda de prensa de los responsables de los sindicatos CSI, CGT y CNT denunciando la violencia policial y l’asaltu a la Casa Sindical de Xixón durante el 14P.

Delles organizaciones polítiques sumáronse a la riestra de denuncies pola actuación policial en Xixón y nel restu d’Asturies.

Conceyu Abiertu solidarízase col deteníu n’Uxo

La sección de Mieres del movimientu políticu asturianu amuesó "el so sofitu y solidaridá col deteníu ayeri [por el miércoles] n’Uxo" durante la xornada de paro xeneral en supuesta rellación a un corte de la autovía A-66. Conceyu Abiertu de Mieres pidió "la so absolución ensín cargos por mor de la dinámica represiva que vivimos ayeri". Valora tamién la organización nacionaliega que na xornada del miércoles 14P "viviéronse numberosos abusos de poder y autoridá empobinaos pola Delegación de Gobiernu y executaos pola Policia Nacional que van quedar impunes dafechu". Pa CA de Mieres "mentantu’l sistema políticu y socioeconómicu abusa día a día con distintes manifestaciones de los y les trabayadores cuando la xente planta cara a esta fola neolliberal y autoritaria que tamos viviendo la rempuesta nun ye otra que la más absoluta intolerancia y unilateralidá, cola represión como protagonista".

Compromisu denuncia la participación de la Policía Municipal na violenta represión

Daniel Fernández, voceru de Compromisu por Xixón, asegura qu’esiste un "pactu nel ADN de PP y Foru pa reprimir a el trabayadores y movimientos sociales". Fernández criticó abiertamente l’actitú de la Policía Local na xornada de Fuelga Xeneral, "que se xunió a l’actitú irresponsable de la Policía Nacional, que llegó a asaltar la Casa Sindical". Compromisu por Xixón calificó de “llamentable l’actitú de la Policía Local na xornada de la Fuelga Xeneral, que se punxo al serviciu de la Policía Nacional pa provocar disturbios innecesarios y asina favorecer la intervención de les fuerces d’antidisturbios” y aseguró que pa “Foru y PP debe ser un arguyu terrible que s’asaltara la Casa Sindical, lo que nun ye más qu’otru pasu na esguilada represiva que quieren imponenos pa siguir col camín de retayos sociales y eliminación de derechos”. Pa la organización de la izquierda asturiana “la Ordenanza de Convivencia que quieren sacar dambes fuerces polítiques que, como yá denunciemos munches
vegaes, nada tienen que ver cola eliminación del botellón y tien enforma que ver con evitar les protestes y les acciones reivindicatives”. Terminaron el so comunicáu esixendo “la retirada inmediata de tolos cargos" a los cuatro deteníos na xornada del miércoles.

IU de Xixón pide investigar l’actuación de la Policía Municipal

El grupu municipal d’IU nel Ayuntamientu de Xixón, per boca del so conceyal Francisco Santianes, pidió ayerí a l’alcaldesa que "abra una investigación sobre la actuación de la Policía Local y se depuren responsabilidades si diera llugar", tras la participación d’axentes locales na detención de tres miembros del piquete informativu de CSI, CGT y Suatea, siguíu del allanamientu de la Casa Sindical poles unidaes de la UIP. Dice Santianes que "la Policía Municipal nunca hasta agora se involucrara n’actuaciones escontra piquetes o manifestaciones". En pallabres de Ceferino García Terceño, miembru del conseyu d’IU en Xixón y afiliáu a CC.OO., que presenció les fechos "tres coches de la Policía Municipal y seis o siete motoristes entamáronla a toletazos con tol que se movía» na Plaza L’Humedal y na redolada de la Casa Sindical. Según el sindicalista "nunca vi a la Policía Municipal actuar de manera tan desmesurada e innecesaria".

Presumible montaxe policial en Vallecas

En Vallekas, el deteníu nel piquete obreru y popular del barriu madrilanu, acaba d’entrar na prisión de Soto’l Real por orde xudicial. La delegada del Gobiernu en Madrid, Cristina Cifuentes, cargu que caltién magar que’l so maríu ta fuxíu de la xusticia y en paraderu desconocíu, señaló a la peña fubolística Bukaneros, seguidores del Rayo Vallecano, como causantes de los disturbios que tuvieron llugar nel 14P. Como consecuencia d’ello, la sé de la peña fubolera foi rexistrada, llevando la Policía material informático y pirotécnicu, les habituales bengales qu’allumen les grades de los estadios de fúbol.
La secuencia de los fechos nos que se detuvieron al mozu vallecanu ye la siguiente: al mediudía, a l’altura del Puente Vallecas les unidaes UIP de la Policía Nacional carguen violentamente escontra’l piquete obreru y popular. Una persona desconocía dexa caer al suelu una mochila que contién una bombona pequeña de gas, dos litos de gasolina y un petardu de grandes dimensiones. Darréu los axentes prinden a una pareya moza que participaba del piquete, un rapaz y una rapaza, a los qu’acusen de portar el material españible. Güei sábadu, arguementando "riesgu de fuga", el mozu ye emprisionáu.

En tol Estáu 110 persones fueron deteníes durante la xornada de paro xeneral.

DOCUMENTOS