Radios libres: las voces de la gente

19 de febreru de 2013 DE 2013 • Glayiu

La esistencia de medios radiofónicos que nun busquen porgüeyu económicu nin tán venceyaos a nengún grupu mediáticu ye una realidá que lleva furrulando nel Estáu dende’l fin del franquismu. N’Asturies, la más veterana d’elles, Radio Qk, cumplirá treinta años de vida esti 2013. La voluntá d’una radio llibre ye, como espliquen nesti documental catalán, espardir la comunicación directa na sociedá, ensin dependencies esternes que condicionen los sos conteníos.

“Radios Libres. Las voces de la gente“ ye un documental de 50 minutos de duración, producíu y realizáu pola Asociación Cultural La Tripulación del Comodín (Barcelona). Asemeyando un particular programa de radiu nel que se combinen el llinguaxe radiofónicu col audiovisual, esti trabayu pretende que l’espectador faiga una idea clara y sincera sobre qué son les radios llibres, d’ónde salen, cómo funcionen, cuál ye la so situación llegal y, sobremanera, cómo se dibuxa’l so futuru.
A una introducción curtia sobre l’orixe d’estos proyectos de comunicación siguirá-y una nutrida y sobradamente representativa serie d’entrevistes a miembros de delles de les radios llibres hestóriques de too l’Estáu Español y representante d’entidaes venceyaes a estos medios y/o implicaes nel procesu lexislativu que los afecta, apurriéndonos los elementos necesarios pa componer el paisaxe.