Radio Kras acosada poles sociedaes d’autores

La emisora llibre xixonesa afronta tres demandes de la SGAE, AIE y AGEDI

17 de marzu de 2013 DE 2013 • Glayiu

Radio Kras ye una emisora llibre y non comercial de Xixón qu’emite dende va ventisiete años. Nun tien publicidá, nun recibe subvenciones y mayoritariamente nun emite música que tea rexistrada na SGAE o nenguna otra sociedá d’autores. Sicasí, agora afronta dos demandes xudiciales que-y reclamen unes perres que nun tien, lo que puede suponer el fin de la so vida.

El pasáu día 14 Radio Kras acudió a un actu de conciliación cola AGEDI-AIE ente la demanda que la Asociación de Xestión de Derechos Intelectuales-Asociación d’Intérpretes y Executantes-y puso. AGEDI-AIE recláma-y a la radio llibre asturiana "13625,28 € si nos apliquen la categoría 2 ó, nel so casu, 3982 € si nos apliqien la categoría 4, eso si demostramos que nun tenemos ánimo de lucro, nun emitimos publicidá y nun recibimos mas de 25.000€ en subvenciones", desplícanos Falo Marcos, un de los fundadores de Radio Kras. Nel actu Kras opúsose dafechu a la demanda, puesto que "somos una entidá ensin ánimo de lucro, nun obtenemos nengún ingresu por esplotación comercial, nun tenemos publicidá, damos a conocer músiques que nun suelen tener cabida nes emisores comerciales y promocionamos grupos o cantantes noveles. Sin embargo, estes entidaes de xestión de derechos con presupuestos de millones de euros nun valoren nada d’esto nel so afán recaudatoriu", afirma Marcos.
Les emisores llibres, como presentáremos nel documental Las voces de la gente, suelen tener un claru calter anticomercial, financiándose por medios alternativos, non venceyaos a la habitual publicidá. Nel casu de Kras "l’asociación qu’afita la nuestra esistencia caltiense económicamente de les cuotes de los socios y socies, fundamentalmente la xente que fae programes de radio y algunes persones que, nel so día, participaron nesti proyectu de comunicación alternativa y siguen collaborando como socies.
Resúltanos bastante difícil poder mantener esti proyectu económicamente, como pa facer frente a estos pagos. Si xusticia da la razón a estes entidaes de xestión, eso supondría la desapaición del nuestru mediu, depués de más de 27 años de existencia, por nun poder afrontar los gastos", confluye’l voceru de la radio xixonesa.
Radio Kras puede sentise na ciuda de Xixón nel 105 de la FM, y per Interné na web http://radiokras.blogspot.com.es,