Que la represión nun pare la llucha

5 de febreru de 2014 DE 2014 • Glayiu

FUSOA convoca una concentración güei miércoles a les 19:30 na Plaza humedal de Xixón. "La represión, les detenciones, los golpes, la policia.. nun tien qu’espantanos ni facer la llucha. Tenemos que tar sollertes y preparaos/es. Estender la rede de solidaridá y sofitu y coincidir toos y toes na defensa a tolos niveles contra ésta escalada represiva que pasín a pasu recuérdanos a un Estáu policial puru y duru."

Durante estes últimes selmanes tamos viendo como se ta entamando una verdadera escalada represiva de parte l’Estáu ante’l puxu y l’espardimientu de la protesta y la llucha popular contra la situación social a la qu’esti sistema nos lleva. Dende la revuelta nel barriu de Gamonal en Burgos con 40 deteníos/es, ocupación policial de la zona y peticiones de prisión, estendiéronse en dellos llugares del Estáu español manifestaciones de solidaridá que traxeron tamién decenes de deteníos/es, cargues y agresiones policiales xabaces.

El clima represivu, la presencia y les actuaciones policiales contra la xente más activa na llucha social medraron y s’asoceden una trés otra. Montaxes policiales como la detención de dellos compañeros/es llibertarios/es en diferentes redaes, ente los que s’alcuentra un mozu asturianu o l’actuación de los Mossos d’Esquadra en Barcelona contra l’emblemáticu Centru Social Okupáu Can Vies, que fue destrozáu durante’l rexistru policial y del que fue robáu numberosu material informáticu cola escusa d’atropar prebes contra 6 xóvenes deteníos por agredir supuestamente a una panda de facistes el pasáu 12 d’Ochobre. A unu d’estos xóvenes pidin-y prisión ensin fianza.

Ésti pasáu domingu una muyer de 60 años foi fería mui grave en Valladolid a causa d’una agresión policial durante una concentración contra la convención del Partíu Popular onde delles persones foron tamién deteníes y golpeaes. Lo mesmo que n’Alcorcón durante una manifestación de los/es trabayadores de los servicios públicos del Ayuntamientu que foi xabazmente reprimía poles fuerces policiales y qu’acabó cola detención de 15 persones.

No más cercanu, equí n’Asturies, esti llunes foi deteníu a manes de la Policía Nazional un compañeru de la Corriente Sindical d’Izquierdes, acusáu d’efectuar unos supuestos estropicios durante la movilización contra la zona azul en Llugones. Tamién tenemos pendientes los xuicios de los deteníos durante la pasada fuelga xeneral y decenes de multes y sanciones por movilizase y manifestase.

La represión, les detenciones, los golpes, la policia.. nun tien qu’espantanos ni facer la llucha. Tenemos que tar sollertes y preparaos/es. Estender la rede de solidaridá y sofitu y coincidir toos y toes na defensa a tolos niveles contra ésta escalada represiva que pasín a pasu recuérdanos a un Estáu policial puru y duru. Y sobre too llamamos a intensificar y profundizar na movilización activa y directa que ye lo que-yos manca y esmolez y tamién lo qu’obtién resultaos. Xuníos/es y fuertes nun podrán con nosotros/es. Solidaridá con tolos/es represaliaos/es. Nin un pasu atrás frente a la intimidación y violencia policial. Puxa la llucha de la clase obrera.

Entama: Fondu Unitariu de Solidaridá Obrera d’Asturies (FUSOA)