Premios Príncipe d’Asturies: quién lo decidió y cuánto nos cuesta

25 de ochobre de 2012 DE 2012 • Vítor Suárez

Estos díes van celebrase n’Uviéu los actos de los Premios Príncipe d’Asturies. Somorguiaos como tamos nun periodu de crisis-estafa -agraváu poles xabaces midíes neolliberales del PPSOE- nun se m’ocurre meyor momentu qu’esti pa sumar fuercies y que los qu’hasta agora fueron súbditos pasen a ser ciudadanos.

Nun momentu onde la sociedá s’esmolez más que nunca pol destín del dineru público y los movimientos de los d’arriba contra los d’abaxo, creo que nos correspuende a les xentes de la izquierda asoleyar tolos marafundios y rellaciones de poder que tán tres estos premios. Quiciás con ello consigamos que, persones que nunca se cuestionaren la institución o mesmamente’l marcu constitucional, entamen a facelo agora. Esta ye la mio humilde aportación.

– Los Premios Príncipe d’Asturies dependen de la Fundación privada de mesmu nome, constituyida en setiembre de 1980 con un capital de 120.202,42 euros. Esta cantidá inicial aportáronla: la Caja de Ahorros, nun 50%; el Banco Herrero, la Banca Masavéu, la Caja Rural y un particular anónimu.
– Nació col oxetivu doble d’estimular los trabayos científicos n’España y latinoamérica, y estrechar llazos ente’l Príncipe d’Asturies y el Principáu. Yá dende l’entamu vendióse la so proyeición internacional como indispensable pal futuru d’Asturies y d’España. Na firma del acta constitucional el presidente del Conseyu Rexonal d’Asturies; Rafaél Fernández, senador pol PSOE, llegó a pidir encarecidamente” a tolos diputaos y senadores la so asistencia a los actos.
– Al frente del patronatu de la entidá siempre tuvieron persones del mundu empresarial y financieru: Pedro Masaveu, Plácido Arango o José Ramón Álvarez Rendueles.
– Lo que se tien gastao na organización y entrega de los Premios nestos trenta años ye dificil de cuantificar: nin la parte privada, nin la pública. Namái dende l’añu pasáu la Fundación fai públicu’l so presupuestu. Ateniéndonos a eses cifres últimes la cantidá subvencionada esti añu asciende a 728.000€, nun se sabe mui bien en conceutu de qué, a lo qu’habría que sumar tol gastu de seguridá que suponen los actos nos qu’intervienen miembros de la Casa Real y que faen que los asturianos y asturianes vivamos nun auténticu estáu policial, criminalizando cualquier intentu de protesta.
– Estes aportaciones públiques proceden del Gobiernu del Principáu d’Asturies; quien tien un conveniu cola Fundación por valor de 150.000€ añales, a los que suma otros 211.185€ de la partida de “Promoción cultural y biblioteques”. El restu aportenlo anguaño los ayuntamientos d’Uviéu, Xixón y Avilés, polos actos qu’ellí se desendolquen.
– La Fundación sigue solicitando fondos públicos magar que ta teniendo superávit: 300.000€ en 2011 y un 23% más en 2010.
– Los ingresos privaos de la Fundación proceden de les donaciones de les personalidaes ya instituciones qu’integren el so Patronatu y de los rendimientos del so patrimoniu. Los espacios onde la Fundación desendolca la so actividá tán cedíos, en munchos casos, pol Ayuntamientu d’Uviéu.
– Anguaño cuenta con un patrimoniu de 29.500.000 €.

Con toos estos datos, a mou d’exemplu, ye fácil decatase del negociu qu’hai detrás d’esti llaváu de cara de la monarquía española que, desgraciadamente, lleva’l nome d’Asturies.