Pola llibertá de Miguel ya Isma

30 de abril de 2014 DE 2014 • Glayiu

Esti llunes 28 d’Abril hubo una manifestación en Xixón en solidaridá con Miguel ya Isma, que siguen en prisión dempués de ser deteníos pola so participación na manifestación del pasáu 22 de marzu en Madrid. Dende Asturies xuniendose al restu les voces que s’alcen por tol Estáu español esixen l’aplicación del principiu de presunción d’inocencia y la so puesta en llibertá darréu.

La tarde entamaba con controles policiales a 150 metros de la Casa Sindical de Xixón, nos que foi identificáu un bon númberu militantes de la Corriente Sindical d’Izquierda, con rexistros de coches, etc.

Un fuerte control policial acompangó esta manifestación, qu’empezó pasaes les 19:30 la tarde y percorrió diverses cais de Xixón, pa terminar énte a la see’l PP.

Demientres tol percorríu, nunca pararon los glayíos y conseñes de “Miguel ya Isma llibertá”, “Nun tamos toos, falten los presos”, “Tamos fartos de represión”, “Compañeros presos, llibertá”, etc.

La manifestación taba convocada por ¡Asturies en Pie!. (Formen parte de ¡Asturies en Pie!: CSI, CGT, CNT-Xixón, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU).

A la fin de la manifestación lleóse’l comunicáu que vien darréu:

Como toes y toos sabéis, los collacios Miguel ya Isma siguen en prisión dempués de ser deteníos pola so participación na manifestación del pasáu 22 de marzu en Madrid.

Non cabo dulda de la desesperada situación pola que tán pasando millones de persones n’Asturies y nel Estáu español. Despidos, pieslles d’empreses, paru, perda viviendes, families arruinaes, probeza xeneralizada..., tán xenerando una riestra protestes sociales cada vegada más intenses.

La rabia popular va xorreciendo cuando se compreba la escesiva riqueza na que vive una minoría privilexada y la patente impunidá qu’arrodia a una corrupción político y económico cada vegada más xeneralizada.

Los mesmos que nos despiden, que nos quiten les melecines, piésllennos hospitales, niéguennos la educación, desanicien los servicios sociales y mándennos a vivir na miseria, nun dulden en llanzase a una política represiva na que los y les trabayadores, que son les verdaderes víctimes de la cris, son trataos como delincuentes cuando salen a la cai col únicu oxetivu de pidir derechos tan básicos como un trabayu dignu o un techu onde vivir.

La situación llegó a un puntu en que cualisquier persona que participe en dalguna de les munches lluches sociales que tán dándose, puede acabar na cárcel.

Sicasí, el Gobiernu remana una vara midir estremada cuando, por casu, non yá nun escuerre los delitos de fraude fiscal, fuximientu d’impuestos o corrupción, sinón qu’amnistíalos, prémialos y garantiza la impunidá de quien cometen dichos delitos.

Pero Miguel ya Isma nun tienen los privilexos d’esta casta de millonarios corruptos. Cometieron el delitu de pertenecer a families obreres que nun tienen otra alternativa que salir a la cai a defender los sos derechos más básicos. Y por eso tán na cárcel.

Dende Asturies xunímonos al restu les voces que s’alcen por tol Estáu español y esiximos, pa ellos, l’aplicación del principiu de presunción d’inocencia y la so puesta en llibertá darréu.

¡MIGUEL YA ISMA LLIBERTÁ!