Pol derechu a vivir dignamente

10 de xineru de 2014 DE 2014 • Glayiu

Dientro de la Campaña "La nuesa dignidá perencima de la vuesa cobicia", l’Asociación contra la esclusión social Alambique ta promoviendo una acción pol derechu de pidimientu por que toa persona tenga derechu a vivir con unes condiciones mínimes que non yá dexen la so supervivencia, sinón que faigan posible desendolcar la so vida con dignidá.

Dende’l 17 de Xineru hasta’l 20 de Febreru l’Asociación Alambique va recoyer allegamientos pa esixir que se cumpla’l derechu a vivir dignamente cola reconocencia de les siguientes midíes:

1 - Gratuidá nel tresporte públicu de los conceyos y la CTA pa les persones que nun tienen ingresos percima del estragal dela probeza (876.45€).
2 - Gratuidá nos suministros básicos (agua, lluz y gas) pa les persones que nun tienen ingresos percima del estragal de la probeza (876.45€).
3 - Garantizar l’alimentación básico de toles persones sol estragal de la probeza, facilitando l’accesu a los alimentossuficientes de manera directa.
4 - La Renta Básica de les iguales pa toles persones, empezando poles persones desemplegaes que tán si nengún ingresu económicu.

El día 20 de Febreru van realizar la entrega de toes los pidimientos recoyíos nun actu públicu. Si quies participar na Campaña puedes faelo:

- Roblando’l derechu de pidimientu y faciéndonos lo llegar.
https://www.dropbox.com/s/cm30i4fqcbkz13n/derechodepeticion.pdf

- Participando nes acciones de denuncia que se van a realizar mientres la Campaña.

- Participando na recoyida de firmes qu’empieza’l día 17 de Xineru a les 11:00 delantre de la Fundación Municipal de Servicios Sociales de Xixón (Fábrica de miseria ensin solución).

- Entamando una recoyida de firmes nel to barriu, pueblu y ciudá pa esixir el derechu a vivir dignamente.

- Si sois un colectivu o asociación, sofitando espresamente les midíes esixíes pa reconocer el derechu a vivir dignamente.

NUN QUEREMOS LLIMOSNA, QUEREMOS XUSTICIA SOCIAL.
¡¡VIVIR DIGNAMENTE YE UN DERECHU!!