Pol derechu a decidir

14 de payares de 2013 DE 2013 • Glayiu

Dende’l Coleutivu Milenta Muyeres y Moces y La Plataforma Feminista d’Asturies denuncien l’atropellu que contra los derechos de les muyeres pretende llevase a cabu’l próximu vienres dia 15 na Xunta Xeneral del Principáu, cuando UPyD presenta una ILP de marcáu sesgu antialbortista que’l so testu ye una ataque flagrante a los derechos de les muyeres asturianes.

La Plataforma Feminista d’Asturies convoca a tola sociedá esti vienres, a les 8:15 de la mañana, na puerta de la Xunta del Principáu, pa manifestar la nuesa opinión a tolos diputaos y diputaes qu’esa mañana dirán votar la propuesta lexislativa. Y n’especial, al diputáu d’UPyD que decidió retomar una propuesta lexislativa que, con argumentos falsos, pretende llindar y condicionar el derechu de les muyeres a decidir. Y que decidió faelo como vengación política.

Comunicau:

Dende la plataforma feminista D’Asturies queremos denunciar l’atropellu que contra los derechos de les muyeres pretende llevase a cabu’l próximu vienres dia 15 na Xunta Xeneral del Principáu, sofitando una propuesta lexislativa popular empuesta a tarazar el derechu a decidir de les muyeres y obligales por tantu a prosiguir de manera impuesta con un embaranzu ensin buscar.

Nun se realizó hasta la fecha en Asturies nengún alderique fondo y rigoroso sobre’l derechu a decidir de les muyeres, tán considerándose les opiniones relixosu y priváu como elementu científicu d’analís, y de xacíu entendemos que los y les representantes de la ciudadanía deberíen d’actuar con seriedá política ante la posibilidá de tomar decisiones qu’escluyan a más de la metá de la población asturiana.

El supuestu síndrome “post-albuertu” ye ensin batura a duldes un convencimiento relixosu eleváu a categoría científica ensin qu’esista pa ello nengún procedimientu de contraste establecíu dende la práctica profesional. Pa poder apelar a tal patoloxía precísense datos cuantificables y estudios de corte llonxitudinal que respuendan por dicha sentencia científica, tomalo por tantu como elementu de xuiciu na votación sobre’l derechu a decidir ye ensin batura a duldes, una de les mayores burlles a les que les muyeres tuvímonos qu’enfrentar dende la finalización de la dictadura franquista.

Entender que’l cuerpu y la vida de les muyeres puede ser oxetu llexislable dende los poderes políticos, ye frayar de manera grave derechos humanos fundamentales. Aquellos y aquelles qu’apelen a la privacidá de la economía, nun tienen nengún reparu éticu en tratar d’imponer lleis de corte dictatorial que resalven de manera radical la llibertá a la que toa persona tenemos derechu.

Denunciamos asina mesmu la hipocresía constante de la derecha que mientres conderga ensin paliativos a les muyeres que deciden sobre la so vida y el so cuerpu, retayen de manera escandalosa toes aquelles propuestes que dende’l feminismu venimos proxectando pa prevenir los embaranzos ensin deseyar, ensin empléu dignu, ensin educación sexual ya igualitaria calidable, ensin cultura social equitativa, y ensin llibertá d’espresión non puede atayase un problema que la derecha solo esmolezse de condergar. Nós les feministes esmolecémonos de tratar y desaniciar.

Asina mesmu, queremos resaltar de manera pública la indefinición constante a la que xuega’l partíu UPyD. Les enmiendes realizaes pola diputada Rosa Díez a la llei IVE entá vixente nel nuesu estáu, resultaron del tou inintelixible y tendenciosu. Frente a una cuestión d’esti calibre la sociedá nun podemos tolerar que se xuegue cola opción que rentabilice más votos, l’oportunismu políticu ye una lacra que de momentu tenemos de desterrar de la vida parlamentaria, y pallo hemos de conocer y reconocer a quien sofiten propuestes que s’asitien de manera clara en contra de la llibertá de les muyeres y negar de manera radical cualquier sofitu electoral a esti tipu d’organizaciones.

Dende la Plataforma Feminista d’Asturies queremos convocar a tola sociedá a nun consentir nin dexar nin un minutu más qu’un escañu resulte una escusa p’atentar contra los derechos humanos de les muyeres. Nin madres nin albortistes. Pol derechu a decidir.