Picu Rabicu promoviendo’l comerciu xustu y el consumu responsable

24 de xunu de 2014 DE 2014 • Glayiu

Picu Rabicu ye una asociación que vien trabayando n’Asturies dende l’añu 1998, promoviendo’l comerciu xustu y el consumu responsable, empobináu principalmente a l’alimentación.
La situación actual de crisis económica ta afeutando gravemente a Picu Rabicu. Por eso convoquen un conceyu abiertu, el próximu xueves 26 de xunu nos locales de la C.S.I. a les 19:30 a tolos coleutivos cercanos a Picu pa esplicar la situación de la tienda y les propuestes que falamos na nuesa asamblea pa intentar salir p’alantre, tamién pa escuchar les idees que podáis aportanos y pa pidivos que nos ayudéis col trabayu que vamos tener que facer.

Porque l’alimentación ye un derechu fundamental, toes y toos tenemos derechu a tener una alimentación abondo en cantidá y calidá, ensin esplotar a naide nin estropiar el mediu ambiente:

Defendemos un comerciu que pague un preciu dignu al productor/a, que respete’l mediu ambiente y los derechos de toles persones que participen na cadena alimentaria, dende la producción a la comercialización, que suministre alimentos sanos y afayadizos culturalmente.

Defendemos el derechu a la soberanía alimentaria de tolos pueblos: somos nós, y non el FMI nin la UE, quienes tenemos de decidir qué alimentos producir y cómo faelo.

Per aciu la nuesa tienda tamos llevando a cabu una llucha diaria escontra’l capitalismu, dando la posibilidá a consumidores y productores de salir de los circuitos de comercialización dominaos peles transnacionales agroalimentaries y les grandes cadenes de distribución, de convertir la nuesa compra cotidiana, el nuesu trabayu, nun actu de llucha.
Cola nuesa práctica comercial, un llabor de sensibilización y un trabayu de movilización social cuntamos camudar los modelos de rellaciones económiques actuales y participar na construcción d’alternatives.

Vendemos artículos d’alimentación y hixene, producíos por cooperatives comprometíes cola realidá del so pueblu, que priorizan la producción pal mercáu local y namás nos vienden los sos escedentes.

Los principios del comerciu xustu y de l’agricultura ecolóxica tamién los aplicamos nel nuesu país y nun importamos artículos que yá se producen equí con unos componentes sociales y ecolóxicos equivalentes.

Los nuesos productos nun son baratos, porque vender baratu nomás se consigue pagando sueldos miserables a los/es obreres; pero tampoco son más caros que los alimentos convencionales cola mesma calidá.

Hai delles persones qu’antes podíen comprar na nuesa tienda y agora non. Pero tovía hai munches/os trabayadores que podríen facelo, pero nun mos conocen o piensen que tamos faciendo caridá o yos da pereza porque yos queda lloñe.

Queremos pidivos el sofitu de les vueses organizaciones pa intentar llegar a estes persones, pa salvar esti proyectu cuyo oxetivu ye tresformar radicalmente el sistema pa que toes tengamos de fechu derechu a alimentanos sano respetando a les demás.
Gracies o toes pol vuesu sofitu.