Pequeñes victores contra’l fracking

Abandonáu el proyeuctu Viñón I d’estración en Villaviciosa

9 de xineru de 2013 DE 2013 • Glayiu

El fracking ye la técnica d’estración de gas natural pola la frayadura del suelu mediante esplosivos y la indición d’arena, agua y productos químicos a presión. L’altu impactu ecolóxicu que conlleva la frayadura hidráulica vien siendo denunciada poles organizaciones ambientalistes. N’Asturies hai dellos proyeutos d’estración por fracking na costa ente Villaviciosa y Ribesella. Ún d’ellos, el nomáu Viñón I, cincáu xusto na llende ente Villaviciosa y Cabranes, acaba de ser retiráu.

La estración de gas natural col frackin topó cola oposición frontal de los grupos ecoloxistes pol esfarrape de los recursos naturales y el riesgu pa la salú que conlleva la frayadura hidraúlica. Del trabayu en comuña de los ecoloxistes y la ciudadanía salió la Plataforma asturiana escontra’l Fracking.
El fracking ye una técnica d’actuación dende la superficie, frayando pasín a pasín les capes de roca virxe nes que tan les partícules de gas natural con esplosivos, ruptures que se mantienen abiertes con agua y arena metíes a presión, per onde fluye’l gas hacia la superficie. Pa que tol equipu nun sufra la corrosión de los ácidos del subsuelu, amesten tamién productos químicos qu’en delles vegaes yá contaminaron los acuíferos naturales qu’hai na tierra.
Hai dellos estudios p’alcontrar gas natural n’Asturies: Viñón I ente Villaviciosa y Cabranes, Cuélebre I y II, de Villaviciosa a Ribesella. El primeru d’ellos vien de ser descartáu pola empresa qu’entamó los sondeos previos, polos malos resultaos que sacaron. Petroleum Oil & Gas España, firma que afuró en nel conceyu maliayu pa buscar gas, taba participada ente otros por Hunosa. Magar que taba nes llendes del conceyu Villaviciosa, foi Cabranes quien más se movilizó en contra por tar los sondeos mui averaos al so territoriu.
La selmana pasada Conceyu Abiertu presentaba tamién alegaciones al fracking na Xunta Xeneral, desixendo al partíu nel poder que se manifestara de forma nidia escontra la frayadura hidráulica, siguiendo la pauta que marcó’l grupu socialista nel Congresu los Diputaos de Madrid presentando una proposición non de llei escontra’l fracking: “Poles graves consecuencies medioambientales qu’acarreta’l métodu d’estracción conocíu como francedura hidráulica, solicitamos que s’anicien los trámites llexislativos pertinentes (un decretu, una llei o otra fórmula, que podría llevar una moratoria o bien ser un alcuerdu definitivu) mediante los que se prohiba l’usu d’esta técnica en tou’l territoriu d’Asturies y se paralicen por tanto, tolos proyeutos d’investigación vixentes, de mou que se declare Asturies llibre de fracking.”