Paséu ciclista pola antigua A-66 d’Uviéu

13 de avientu de 2013 DE 2013 • Glayiu

La plataforma "Imaxina un bulevar" convocó pal próximu domingu 15 d’avientu, a les 12:00 un paséu ciclista popular a lo llargo de l’antigua autopista A-66 d’Uviéu. Los convocantes tachen de falta de sensibilidá a los grupos políticos municipales polos graves problemes sociales y ambientales causaos por esta barrera urbanística que carecen diariamente alredor de 25.000 vecinos y vecines de la ciudá.

El percorríu va trescurrir ente la Glorieta de la Cruz Roja en Xeneral Elorza y el Barriu de Guillén Lafuerza. Tres l’ésitu de la marcha celebrada’l pasáu 29 de setiembre, con esta nueva acción la Plataforma ciudadana quier demostrar que pasu a pasu’l tresformamientu d’esta infraestructura obsoleta nuna avenida urbana va faciéndose realidá. Y ello a pesar de la ceguera y la falta de sensibilidá demostrada polos grupos políticos municipales -sacante Izquierda Xunida, qu’amosó’l so sofitu a la propuesta- escontra los graves problemes sociales y ambientales causaos por esta barrera urbanística que carecen diariamente alredor de 25.000 vecinos y vecines de la ciudá.

N’esta ocasión quieren demostrar sobre’l terrén les enormes posibilidaes d’esta vía p’acoyer maneres de tresporte alternativos y sostenibles como la bicicleta. Nun ambiente festivo, la marcha va sirvir coles mesmes pa denunciar la discriminación que sufren los barrios de la parte baxa de la ciudá, que’l so últimu episodiu, la construcción d’una pasarela sofitada nuna enorme escollera con un altor equivalente a un edificiu de trés llantes, ocupando un espaciu llibre colindante al Centru de Salú y quitando de lluz y vistes a les viviendes de la so redolada, ta provocando numberoses protestes.

Dende’l colectivu conviden a esti inéditu paséu, amás de les ciclistes, toles persones qu’utilicen cualquier mediu de tresporte sostenible como caminar, patinar, etc. Al términu de la marcha, alredor de les 13:00, vamos compartir un aperitivo na cai Río Navia preparáu coles aportaciones de les participantes.

DOCUMENTOS