Ocalitos pa favorecer a la industria papelero

10 de xineru de 2014 DE 2014 • Glayiu

La Coordinadora Ecoloxista d’Asturies acusa al Gobiernu d’Asturies d’autorizar el plantíu d’ocalitos pa favorecer a la industria papelero. Esti tipu d’árbol, toma la sesta parte del territoriu arboláu y reemplazó a la "práctica totalidá" de los montes costeros. Asina, la Coordinadora denunció que’l plantíu d’ocalitos ta "a puntu" de romper la barrera de les 61.338 hectárees, llende fita pol Plan Forestal d’Asturies pal añu 2060.

Dende la Coordinadora acusen al Gobiernu d’Asturies de plegase a les presiones y d’actuar "de resultes de les fuertes presiones exercíes pola multinacional papelera y los madereros", al autorizar plantíos d’ocalitos. Nesti sentíu, denunció la esistencia d’un ’lobby del ocalitu’, que "dicta la política y la planificación forestal d’Asturies atendiendo puramente a los sos intereses comerciales, ensin tener en cuenta los criterios sociales nin de mediu ambiente".

Por ello, la Coordinadora propón que se caltenga l’actual regulación sobre los plantíos d’ocalitos decretada en 2009 y que se respeten les llendes de les superficies establecíes pol Plan Forestal, qu’afita un máximu de 61.338 hectárees pal añu 2060. Nestos momentos, adelantró la Coordinadora, yá s’algamó la cifra prevista pal añu 2.053.