Noreña movilízase pol so centru de discapacitaos

10 de xineru de 2013 DE 2013 • Glayiu

Los noreñenses demostraron ayeri que’l centru de discapacitaos Adepas nun ta sola na so llucha pola supervivencia. Alredor de mediu millar de persones manifestáronse al mediudía dende les instalaciones de l’antigua Fundación Rionda hasta la Casa Conceyu, pa reclamar a la Conseyería de Bienestar Social una solución que garantice la continuidá del centru que da sofitu a la integración y que sía la mesma Adepas quien caltenga la so xestión.

Dende "InfoNoreña", que retresmitió vía redes sociales la movilización, informarón que facía tiempu que Noreña nun vivía un día de reivindicación tan multitudinaria como’l d’ayeri nel que la practica totalidá d’asociaciones y entidaes del conceyu tuvieron representaes, destacando l’ausencia de representantes de los partíos del gobiernu municipal. Mientres la concentración recoyéronse gran cantidá de firmes.

Pa rematar l’actu producióse un suelta de globos, tres la cual los asistentes empapelaron la fachada de la Casa Conceyu con pegadielles verdes col logo de l’asociación y la lleenda «Ayuda a Adepas».

Videu y fotografíes facilitaes por InfoNoreña

DOCUMENTOS