¡Nin despidos, Nin pieslles!

3 de xunetu de 2013 DE 2013 • Glayiu

La CSI entama una campaña de movilización permanente escontra los despidos y los pieslles d’empresa. "Con 126.000 trabayadores en paru, Asturies nun puede permitise nin un solu despidu nin un solu pieslle d’empresa más."
"Hai qu’echar la galga a la impunidá empresarial, xuniendo les lluches y engarrando escontra cada despidu que se produza en cualisquier empresa".

Dende’l sindicatu denuncien "que’l pocu trabayu qu’hai ye precariu, casi siempres ensin cotización a la Seguridá Social pa toles hores trabayaes, con sueldos que nun merecen esi nome, con escesu d’hores de trabayu so menacies de despidu, con parte’l sueldu pagáu en prietu, etc”. Y que "empreses con beneficios demosaos siguen despidiendo y faciendo EREs que, a la fin, pagamos ente toes y toos al traviés del FOGASA".

Dende’l sindicatu aseguren que "pa cuelmu d’esta situación si protestes o desixes el más mínimu drechu llaboral, tas na cai. Los despidos de los responsables de les seiciones sindicales de CSI nel taller de Barros de Duro-Felguera o na empresa Sanvicente, son una bona preba d’ello".

Por tou esto, baxu’l lema “Nin despidos nin pieslles”, entamen una campaña de movilización permanente escontra los despidos y los pieslles d’empresa. "Trátennos como si fuéramos una simple ferramienta cola que caltener en funcionamientu’l so engranaxe de beneficios, pero una simple ferramienta puede atascar y faer mugayes hasta’l engranaxe más poderosu".

Empezando cola campaña la CSI quier dar a conocer el casu de la empresa Alacena Cocines Integrales (perteneciente al Grupu Cocines Asturianes) que nun paga a lxs sos trabayadorxs y yá-yos debe cincu meses de sueldu y dos pagues estres. Dende’l sindicatu nun comunicau de prensa aseguren que’l "grupu Cocines Asturianes despidió n’Agostu de 2012 a otros trenta trabayadores (cobrando esi mesmu mes una subvención de 120.000 euros per fomentu del emplegu), y anguañu, un añu dempués, inda nun cobraron la indemnización por despidu. Alacena cobró 1,4 millones d’euros de los Fondos Mineros, y recibió l’añu pasáu un creitu de 400.000 euros". Por ello pregúntense "¿Ónde tan eses perres? ¿y ónde ta’l dineru que factura la empresa?"

Y esixen una solución yá. "Nun podemos permitinos nin un paráu nin una parada más".