Naz Ixuxú Asturies-Euskal Herria elkartea, p’averar la realidá sociocultural asturiana al País vascu

8 de xineru de 2013 DE 2013 • Glayiu

Ixuxú Asturies-Euskal Herria elkartea, ye un proyectu sociocultural que se define como "un glayíu intercultural pa visibilizar aspectos de l’Asturies tantes vegaes invisibilizada y estereotipada". Cultura –sobremanera la música- y temátiques sociales –historia, socioloxía, movimientos sociales…- son los dos pegoyos d’esta iniciativa.

Al traviés d’ella, los sos promotores busquen tamién cubrir les carencies que tien la nuestra cadarma cultural y musical pa salir fuera d’Asturies y fortalecer les rellaciones ente movimientos sociales de distintos ámbitos.

Promoción de grupos en medios de comunicación, organización d’eventos, venta on-line, distribución, management y contratación, programación d’actividaes sociales o talleres, son dalgunes de les actividaes qu’Ixuxú Asturies-Euskal Herria va desendolcar p’algamar los sos oxetivos de da-y puxu a la cultura, a la música y a aspectos sociales d’Asturies fuera de les llendes asturianes.

Pa francer los estereotipos y el desconocimientu xeneralizáu qu’hai de la realidá sociocultural asturiana nel País Vascu –entendiendo amás el País Vascu como tol territoriu onde se fala euskera; esto ye la Comunidá Autónoma Vasca, Navarra y el País Vascu francés-, Ixuxú parte del respetu ente pueblos y cultures y de la búsqueda por estrechar llazos y fomentar la interculturalidá. Un exemplu d’ello ye’l nome del proyectu, Ixuxú como soníu asturianu equivalente a lo que n’Euskal Herria ye un irrintzi.

Primeres actividaes

Exemplos de lo que pretende ser Ixuxú Asturies-Euskal Herria elkartea na práctica diaria ténemoslos coles sos primeres actividaes. Dende esta iniciativa yá tán desendolcando una campaña de promoción y difusión de Mezigayuska, l’últimu discu del grupu ska-fusión La Tarrancha. Tamién abrieron una tienda on-line al traviés de la que venden dellos materiales musicales y sociales asturianos.

Con vistes al futuru, el próximu 2 de marzu se cellebrará nel gaztetxe de Gasteiz un alcuentru asturianu organizáu conxuntamente col Centru Social La Semiente de L’Entregu nel qu’habrá conciertos, charres, pasucais y mercadín de colectivos asturianos, ente otres coses.

Tres d’esto, Ixuxú Asturies-Euskal Herria elkartea entamará a trabayar nun cartafueyu que recopile grupos de música, actividaes culturales y sociales col fin de presentalo y ufiertalo peles bayuroses infraestructures culturales vasques: medios de comunicación, cases de cultura, gaztetxes, centros asturianos, festivales y comisiones de fiestes.