Mil persones en Xixón pola llibertá sindical y contra la represión

Una manifestación de percorríu atípicu clamó contra la persecución a sindicalistes

15 de febreru de 2013 DE 2013 • Glayiu

Los sindicatos de clase asturianos CSI, CGT, CNT y Suatea axuntaron a un millar de persones que percorrieron les cais de Xixón glayando pola llibertá sindical y escontra la represión policial y xudicial, particularmente polos procesos derivaos de la última fuelga xeneral. L’atípicu recorríu qu’empobinó pela cai Magnus Blikstad y terminó na Plaza L’Humedal ensin que hubiere incidente nengún.

La izquierda sindical asturiana movilizóse ayeri pa desixir llibertá sindical y el cese de la represión escontra quienes defienden los sus derechos llaborales y sociales. La iniciativa entamaba en solidaridá con dos afiliaos a la CNT en Logroño pa los que la fiscalía pide penes de 6 y 7 años de cárcel por fechos venceyaos a la cabera fuelga xeneral del 14P. Poro, la movilización d’ayer fizo una estensión de la demanda de derechos sindicales a tolos represaliaos pol so llabor en defensa de los trabayadores.

Partiendo de L’Acerona, la manifestación empobinó pela cai Magnus Blikstad, siguiendo un percorríu nada habitual pa les manifestaciones en Xixón. L’avenida Carlos Marx y Portugal fueron la continuación de la marcha, que finó na Plaza L’Humedal.

Representantes de cada sindicatu falaron en terminando la marcha. "N’Asturies y nel Estáu español hai centenares de presones deteníes, encausaes, multaes, feríes o mancaes, actuaciones policiales brutales, allanadures de sedes sindicales, ataques a drechos de xunta y manifestación, coacciones a drechos de fuelga". Destacaron tamién el llabor negativu que "ta teniendo l’Ayuntamientu de Xixón al enllordiase na persecución y represión de la clase obrera", como asocediera na fuelga xeneral del 14P, fecho pol que tán deteníos 4 trabayadores. Dende CSI reclamaron la dimisión del delegáu del Gobiernu n’Asturies, Gabino de Lorenzo, pol enfotu que tien na persecución de sindicalistes. El voceru de la CNT nun fizo distinción ente los representantes del Gobiernu "d’equí o de La Rioxa. Quexámonos del que tenemos, pero el d’ellí tamién ye coyonudu. Danos igual que tea unu o otru. Nós tamos en contra de la so esistencia directamente".

A la yá tradicional xunidá d’acción entre CSI, CGT y Suatea, hai que sumar dende hai unos meses a la CNT. De fechu, la rempuesta ante les consecuencies llegales y alministratives derivaes de les fuelgues xenerales del 29S y 14P tán teniendo la respuesta xunitaria de los cuatro sindicatos asturianos.