Los trabayadores de la RTPA irrumpen na Xunta Xeneral

Desixen responsabilidaes pola xestión fraudulenta del ente públicu

6 de avientu de 2012 DE 2012 • Glayiu

Aprovechando la primera de les xornaes de puertes abiertes na Xunta Xeneral del Principáu, un grupu de trabayadores y ex empleaos de RTPA fizo un actu de protesta nel hemiciclu asturianu.

Trabayadores n’activo de la RTPA, y miembros de la Plataforma d’Afectaos poles Cesiones illegales de trabayadores(PAC) llevaron el so conflictu llaboral a la Xunta Xeneral del Principáu. Aprovechando la primera de les tres xornaes de puertes abiertes nel edificiu del gobiernu d’Asturies, la plantilla de la radio y televisión públiques asturianes denunciaron que la empresa empobina hacia un ERE cantroxau, a causa principalmente del mediu centenar d’incorporaciones obligaes pola xusticia tras perder otros tantos xuicios por cesión illegal de trabayadores. La PAC denuncia tamién que se tean marafundiando les perres de tolos contribuyentes en xuicios y recursos estériles que condenen una y otra vez a la RTPA pola xestion fraudulenta de la plantilla. "La televisión pública debiera tar al serviciu de la ciudadanía y non pa los clientelismos de la direición de turnu", afirmó un portavoz del colectivu de trabayadores esternalizaos illegalmente.