Los estudiantes denuncien "la deriva elitista" nos presupuestos d’Uniovi

12 de xineru de 2013 DE 2013 • Glayiu

Les Asamblees d’Estudiantes de la Universidá d’Uviéu condenen "l’ataque frontar a la yá devaluada calidá de la educación superior asturiana que suponen los presupuestos pa l’añu 2013 aprobaos en Conseyu de Gobiernu’l pasáu 4 de xineru. La complicidá de la direición de la universidá pa con esti esmantelamientu a cara descubierta de la universidá pública asturiana ye más que patente".

La reducción presupuestaria de la universidá asturiana, un 6,43% esti añu, vien a sumase a les reducciones previes, que faen que de magar 2010 viérase amenorgáu’l so presupuestu en cuasi un 15%. "Más esmolecedor si cabe ye la reducción de la financiación pública sufrida nesti periodu 2010-2013, alrodiu del 30% menos de financiación pública pa la nuestra universidá. El dineru que los entes públicos otorgaben a la universidá en 2010 representa’l 78,69% del presupuestu total de la institución, en 2011 el 75,57% y en 2013 va ser del 67%. Esto amuesa la deriva privatizadora y elitizadora a la que ta sometiéndose a la institución asturiana polos estremaos gobiernos centrales y autonómicos, pues el déficit de financiación hubo suplise cola entrada de capital privao na universidá y coles continues ya inasumibles xubes de tases que les y los estudiantes tenemos sufrío estos años", opina l’órganu de coordinación de los estudiantes asturianos.
Pal conceyu d’asamblees de la Universidá d’Uviéu l’orixe del declive universitariu ta nel axuste a les esixencies europees: "De magar la implantación del Espaciu Européu d’Educación Superior, la mayoría les facultaes vieran amenorgáu’l so presupuesto ente un 40% y un 50% con facultaes onde ye d’hasta’l 65,5% y les consecuencies d’estos presupuestos nun se van facer esperar; la reducción de servicios de les facultaes o l’adelantamientu del so pieslle una hora y más díes al añu cuasi puen considerase males menores comparaos coles conecuencies que van tener los retayos nos diferentes departamentos de la universidá, que van ser incapaces de costiar la docencia asinada. La situación ye tan crítica que se baraxa la posibilidá de pieslles facultaes dafechu, ente elles, la Escuela de Mines d’Uviéu y la Facultá de Comerciu, Turismu y Ciencies Sociales de Xixón énte la falta de financiación pal so caltenmientu".
Pero les culpes nun vienen namás d’afuera, n’opinión de les asamblees d’Uniovi. "La complicidá de la direición de la universidá pa con esti esmantelamientu a cara
descubierta de la universidá pública asturiana ye más que patente cuando estos presupuestos fueran aprobaos ensin respetar los plazos d’enmiendes que dictamina’l propiu reglamentu de réxime internu del Conseyu de Gobiernu y, polo tanto, illegal el plenu nel que s’aprobaran".
Poro, les y los estudiantes anuncien que "per aciu de los y les nuestres representantes nel Conseyu de Gobiernu, interpunximos un recursu de reposición solicitando que se declare nula l’aprobación de dichos presupuestos, sorrayando que de nun atendese’l nuestru recursu, interpondríemos una denuncia al contencioso-alministrativu pa qu’ésti fáiga cumplir los reglamentos de la propia institución. Mentanto, instamos a los gobiernos tanto autonómicu como universitariu a rectificar la so posición pa cola universidá asturiana. Les y los estudiantes vamos entamar cuantes aiciones y movilizaciones sían oportunes en defensa de la nuestra Universidá y educación, la de toes y toos"

.