Llibertá con cargos pa los cuatro deteníos en Xixón

Tras seis hores en comisaría, cientos de persones recibieron a los trabayadores lliberaos

14 de payares de 2012 DE 2012 • Glayiu

Cuatro trabayadores del piquete de CSI, CGT y Suatea fueron prindaos na mañana de güei en Xixón na cai Llangréu y na plaza L’Humedal. Depués de prestar declaración na comisaría del Natahoyo, pusiéronlos en llibertá baxo los cargos de daños y atentao escontra l’autoridá. Miles de persones marcharon dende’l final de la manifestación nel Naútico hasta la comisaría del Natahoyo, donde glayaron "Deteníos llibertá" dende les 13:30 hasta que los lliberaron a les 16:15.

Los cuatro deteníos quedaron en llibertá baxo los cargos de daños y atentáu contra l’autoridá. Na cai Llangréu el piquete de la Corriente Sindical d’Izquierda, CGT y Suatea sufrió una violenta emburriada policial. La detención d’ún de los encausaos precipitó un bastiazu de golpes contra los integrantes del piquete, col resultao de dellos mancaos.

La desbandada que siguió a la carga policial prevocó que les otres tres persones fueran deteníes pola Policía Municipal de Xixón na plaza del Humedal. Una d’elles, mancada d’importancia pola actuación policial previa, foi prindada nel suelu. Una segunda persona foi detenía mientres prestaba auxiliu al mancáu. Y a la tercera persona la detuvieron cuando caminaba hasta la cercana Casa Sindical. Hai que destacar tamién la violenta actuación de los municipales xixoneses, que persiguieron a los sindicalistes pela Acerona y pel parque del Humedal.

Foi posteriormente cuando los axentes de la UIP entraron a la fuerza na Casa Sindical y trataron d’allanar los locales de la Corriente Sindical d’Izquierda.

A les doce de la mañana coló la mulititudinaria manifestación de CSI, CGT, Suatea y CNT. Unes 20.000 persones, ente les qu’hai que cuntar les files de CC.OO., UGT y USO, se manifestaron peles cais del centru de Xixón hasta’l Naútico. Ellí, depués de lleer los comunicaos de cada sindicatu, Marco Antuña, voceru de la Corriente, alvirtió a les autoridaes que de nun soltar a los deteníos enantes e la una de la tarde, los ellí concentraos marcharíen hasta la comisaría pa desixir la so llibertá. Cumplióse’l plazu y al nun tener noticies de comisaría, una columna de miles de persones allegóse a la comisaría del Natahoyo. Dende la una y media, y hasta les 16:15, una multitú reclamó glayando la llibertá pa los deteníos. Una vez puestos en llibertá, sucediéronse les escenes emotives, ente la gayola de los lliberaos y el sofitu de quienes los recibieron.

DOCUMENTOS