Llamazares fae per Nadal lo que nun fae IU d’Asturies

El salariu social, Suzuki o la RTPA

25 de avientu de 2012 DE 2012 • Glayiu

El pasáu vienres una treintena de persones aconceyaron delantre la Xunta Xeneral del Principáu pa reclamar una solución al Salariu social n’Asturies. Pela so parte, los trabayadores de la RTPA y PAC aprovecharon la visita Gaspar Llamazares ayeri llunes a los encerraos de Suzuki pa explica-y la xestión fraudulenta y los despidos nel ente públicu.

El salariu social: una llínea colorada pa IU

El pasáu vienres una treintena de persones aconceyaron delantre la Xunta Xeneral del Principáu de Asturies pa reclamar una solución pa la renta mínima del Salariu social. Magar qu’esa mesma mañana despachárase la discusión sobre los nuevos presupuestos autonómicos (aprobados pol PSOE col apoyu d’IU y UPyD), caltuvieron el llugar de concentración, simbólicu, en palabres de l’Asociación Alambique "pa denunciar que les prioridaes del gastu nun son les persones. Mentantu los parlamentarios se suben el so xornal, atapecen una reforma de la llei del salariu social qu’esanicia la retroactividá del cobru (lo que supón que les personas que esperen, de media, 18 meses para percibilo, solo van cobrar 3 meses d’atrasos y el resto en plazos) y endurez l’accesu a la mesma".
La concentración terminó cola llectura del manifiestu "¡Salario social YA! Dimisión o solución", apoyáu por unos 20 colectivos asturianos, que los organizadores apurrieron a los grupos parlamentarios na Xunta. P’Alambique, "dende l’añu 2005 el salariu social apaez como una ferramienta ineficaz dafechu p’asegurar una vida digna a les persones ensin recursos, una ayuda de miseria más que nun s’entiende como un derechu suxetivu, lo qu’amuesa la necesidá de la Renta Básica de les Iguales como instrumento p’asegurar la dignidá de les persones".
La selmana enantes Alambique publicara una carta abierta al grupu na Xunta d’IU (adxunta al pie del artículu), reclamándo-yos que s’enllordiaren pa desatascar el salariu social. "Queremos pregunta-yos, puesto que nes sos declaraciones dixeron toos estos díes que’l salariu social yera una llínea colorada na negociación del presupuestu, algunes coses pa que puedan esclariar la so postura ente los continuos ataques que dende la Conseyería de Bienestar Social y Vivienda tán produciendo al derechu a unos ingresos mínimos de les persones que menos tienen (...) Creemos que ye’l momentu de qu’Izquierda Unida defienda el Derechu al Salariu Social, derechu qu’ayudó a poner en marcha nel añu 2005 ,y qu’agora ta viendo recortáu y continuamente atacáu, o que públicamente diga que ta d’alcuerdo col Executivo de Javier Fernández y el Partíu Socialista d’Asturies y sepamos a qué atenenos. Nun mos val que se argumente qu’ellos lo afalaron, que si nun fuese por ellos la cosa diba tar peor. Ye hora de pronunciase y defender públicamente esti derechu", diz Alambique.

RTPA Sí aprovecha la ocasión

El colectivu de trabayadores de la RTPA y los afectaos poles cesiones illegales (agrupaos na PAC) aprovecharon la visita del diputáu d’IU Gaspar Llamazares la mañana del llunes a los trabayadores encerraos de Suzuki, na so fábrica de Porceyo en Xixón. Los trabayadores de RTPA y la so mascota Miquimute esperaron al final del alcuentru de Llamazares colos empleaos de Suzuki pa explica-y el problema de la xestión fraudulenta de la RTPA y los despedidos (informe detalláu adxuntu al pie de la noticia). Llamazares esmolecióse pola situación de la plantilla de RTPA y espresó-yos la disposición del so grupu parllamentariu pa sofitalos no que ficiere falta.
Los y les trabayadores de Suzuki, que permanecen nestes feches tan señalaes zarraos na so fábrica, tuvieron un xestu de solidaridá cola problemática de la RTPA, faciendo de so les reivindicaciones de la plantilla del ente públicu.
Dellos medios de comunicación que s’alcontraban cubriendo l’actu sacaron fotos y grabaron l’alcuentru, ente ellos un equipu de TPAnoticias, de la empresa subcontratada Margen. Margen Video ye una de les empreses que cedió trabayadores illegalmente a la RTPA. Poco sorprende yá dicir que la edición del mediudía de les noticies na TPA nun dixo nin rinxu del alcuentru de los trabayadores con Llamazares, nin del sofitu qu’esti dio a les sos demandes. Demandes non siempre atendíes pol grupu parllamentariu d’IU na Xunta Xeneral del Principáu, nin nel conseyu d’alministración del ente públicu.