Les asamblees d’Uniovi ’pasen’ del Defensor Universitariu

Atalanten traicionáu el so papel de mediador ente l’alumnáu y el Rectoráu

12 de marzu de 2013 DE 2013 • Glayiu

Lluéu de que la selmana pasada Ramón Durán, Defensor Universitariu, ficiera por axuntar a los representantes de los alumnos de la Universidá d’Uviéu y al equipu rectoral pa iguar aspereces y afalar el diálogu, les asamblees d’estudiantes denuncien "escurantismu" y "desllealtá" nel llabor del mediador universitariu.

Nuna nota fecha pública ayeri llunes, les asamblees d’estudiantes de la Universidá d’Uviéu atalantaron "terminada" la figura del Defensor Universitariu, Ramón Durán, "poles sos acciones, unillaterales y a la escontra de lo apautao", nel so enfotu por algamar una nota conxunta ente estudiantes y Rectoráu sobre lo asocedío el 31 de xineru pasáu. Nesa fecha representantes de les asamblees d’Uniovi torgaron l’accesu al Conseyu Social de la Universidá a la reunión onde, según los estudiantes, diben " aprebase irregularmente unos presupuestos que conderguen a la institución a un futuru precariu".

La selmana pasada, dellos estudiantes en representación de les asamblees acudieron a una reunión col equipu rectoral solicitada pol Defensor Universitariu pa conocer les diferentes postures ente dambos énte l’actu del pasáu 31 de xineru, nel que se torgara de mou pacíficu’l Conseyu Social. "Pa la mentada reunión, a la que’l señor Rector nin siquiera se dignara a dir, les asamblees d’estudiantes propunximos una rueda de prensa conxunta col oxetivu d’esclarar lo asocedío aquel día, asina como los posibles averamientos de postures que se produxeren na mesma. Por embargu, la directiva refugó dafechu la nuestra propuesta. Pese a esta amuesa clara d’escurantismu, les asamblees accedimos a acudir a la reunión alcordando sacar una nota de prensa conxunta que recoyera los estremaos posicionamientos que xurdieren del alcuentru, siendo esti l’únicu documentu que se difundiera a la prensa por contener la postura de caúna les partes".

Pero Ramón Durán desplicó nuna entrevista los supuestos alcuerdos algamaos colos estudiantes, lo que ye interpretao por estos como una "falta a la so pallabra". Van más lloñe y declaren "categóricamente falses les sos afirmaciones al respeutive la temática tratada, puesto que les pallabres del Defensor Universitariu nun s’axusten a lo asocedío y espón una interesada posición de parte. Consideramos esta aición impropia del llabor d’un Defensor Universitariu que, lloñe de velar por aclarar los fechos, protagoniza esta xugada que solo se pue calificar como deslleal".

Los estudiantes querían recalcar "la criminalización a la que se nos sometió y la direición mediática que se-y diera a l’aición, criminalización nun resuelta y acrecentada per parte’l Rectoráu por omisión y dexando que se dieren por ciertes aiciones qu’enxamás asocedieron". Poro, sorpréndense cuando lleen la citada entrevista que se falara d’unes "normes de convivencia empobinaes a evitar coacciones, normes que baxo nengún conceutu vamos tar dimpuestos a asumir". "La única convivencia posible va ser la de refugu frontal a les polítiques de desaniciu de la Universidá Pública asturiana que tamos sufriendo", afirmen dende les asambleees.