La XPDLA da anuncia de los ganadores de los Premios Andrés Solar na so XXVIII edición

7 de avientu de 2012 DE 2012 • Glayiu

Esti añu El Pegollu, galardón qu’apurre la Xunta pola Defensa de la Llingua Asturiana a quien destacó na promocion del asturianu, foi pal grupu Dixebra y pa la editorial Trabe, que cumplen 25 y 20 años respectivamente de llabor dafechu en bable. Pela cueta, el Madreñazu, distinción negativa pa quienes ataquen la normalización del asturianu, va pa los recortes en materia llingüística y pa la "llei Wert”.

GIF - 36.1 KB

La entrega de los Premios de defensa de l’asturianu va facese’l día 15 d’avientu a les 19:30 hores, nel Salón d’Actos del Antiguu Institutu de Xixón. L’actu va contar cola actuación musical de Dani Stylo que va facer reellaboraciones de temes hestóricos de Dixebra.

Los Premios Andrés Solar algamen nesti 2012 la so XXVIII edición. Como nos sos 28 años de vida, los premios tienen una vertiente doble: per un llau, la Xunta premia a una entidá o persona que rescamplara pol so llabor en defensa o promoción del asturianu. Esti reconocimientu materialízase n’El Pegollu. Y per otru llao tienen una versión negativa, que reconoz a la/es persona/es o entidá/es que rescamplaren pol so llabor negativu pa cola llingua asturiana, esti dudosu honor represéntase con un Madreñazu.

En pallabres de la Xunta, nesta ocasión decidióse concéde-yos el Pegollu de los Premios Andrés Solar, pa reconocer el llabor incansable d’una formación musical, Dixebra, y una editorial, Trabe, que cumplen 25 y 20 años, respectivamente, como proyectos fundamentales pa entender el desarrollu cultural, social y económicu de la llingua asturiana nes últimes décades. Pol so apueste decidíu pola música y lliteratura a lo llargo de bien d’años, demostrando que l’asturianu ye una ferramienta útil y necesaria nel rellatu de la contemporaneidá d’Asturies.

El Madreñazu n’esta edición de 2012 va pa los recortes en materia llingüística y pa la “llei Wert”. La Xunta pola Defensa de la Llingua Asturiana considera que son bonos merecedores d’esti antipremiu, y argumenta que nos últimos años, con diferentes gobiernos y cola pasividá de los grupos parllamentarios, tamos asistiendo a la aplicación d’un programa sistemáticu de desmantelamientu del texíu cultural y mediáticu n’asturianu. No que cinca a la llamada Llei Wert, sola hai que dicir qu’introduz brutales modificaciones que puen suponer un peligru de desaniciu de la enseñanza de la llingua, que yá ta nuna situación de marxinación llaceriosa.

DOCUMENTOS