La UE abre la puerta al fracking

21 de xineru de 2014 DE 2014 • Glayiu

Trescientos colectivos de toa Europa, ente ellos La Plataforma Asturiana Anti-Fracking, denuncien y dirixen una carta abierta a la Comisión, el Conseyu y el Parlamentu européu que sollerta del erru enerxéticu, climáticu y ambiental que supon apostar por esta técnica extractiva.

La Comisión europea va anunciar el próximu miércoles, 22 de xineru, un paquete de midíes pa regular los combustibles non convencionales. Esperábase una esixente directiva sobre fracking, d’acordies con informes encargaos por instituciones comuñales. Pero la presión de dellos países, rebaxó les midíes hasta convertiles en non venceyantes.

L’Executivu detectó na seronda de 2012 hasta 11 vacíos llegales en materia de borrafes mineres, d’agua, d’evaluación ambiental, etc. que tendríen de ser iguaes. Estos afayos tán en llínea con otru informe anterior del parlamentu européu. Nel ochobre pasáu peneróse’l rumor de que la Comisión preparaba, d’acordies con estos defectos detectaos y coles resultancies del analís d’impactu preceptivu a toa nueva lexislación, una esixente directiva que convirtiera les nueves normes en venceyantes.

Sicasí la presión de los Estaos miembros más favorables al desenvolvimientu d’esta actividá, como’l Reinu Uníu o Polonia, llograron tres una intensa campaña de presión, convencer al presidente de la Comisión, Durán Barrosu, de que poner torgues regulatorias a les empreses axorizaría la inversión. Consecuentemente la Comisión va anunciar apenes unes midíes emponedores que según La Plataforma Asturiana Anti-Fracking van escarecer de toa efectividá al nun ser d’obligáu cumplimientu.

La carta roblada por colectivos de 22 países, alvierte de les amenaces d’esta actividá y sorraya qu’imponer esta técnica contra la voluntá de la gran mayoría de la población europea supon una quiebra democrática. La Comisión europea ignora asina la resultancia de la consulta pública que realizó en 2013, onde’l 64% de los europeos amosáronse contrarios a les esplotaciones de los gases non convencionales y un 20% opinión que solo tendría d’esplotase so una estricta regulación.

Les organizaciones reclamen la necesidá d’abandonar la sienda de los combustibles fósiles y d’avanzar escontra unes polítiques enerxétiques basaes nes enerxíes anovables.

Carta y Organizaciones firmantes:
http://heavenorshell.se/wp-content/uploads/2014/01/open-letter-spanish.pdf