La solombra del fracking

15 de xineru de 2013 DE 2013 • Glayiu

El fracking ye la técnica d’estración de gas natural pola la frayadura del suelu mediante esplosivos y la indición d’arena, agua y productos químicos a presión. N’esti documental realizáu por Dani Amo y Rosa Martínez, cuenta l’impactu ecolóxicu que conlleva la frayadura hidráulica y como ta llegando al Estáu Español ensin que les alministraciones informen claramente de los permisos que tán concediendo y ensin que la población sía consciente de los riesgos que supon esta técnica.

Amás de recoyer les evidencies de contaminación y terremotos que la quebra hidráulica provocó n’Estaos Xuníos y otros países, La solombra del fracking alvierte de los peligros pa la salú humana con una entrevista a Nachu Santidrián, ciruxanu oncolóxicu del Hospital de Cruces.

Nel documental participen tamién dellos miembros de les plataformes antifracking de Alava y Burgos y el director de Radiu Valdivielso, que cunta como’l fracking amenacia esti valle burgales.

El pasáu mes d’Avientu de 2012, l’asociación La Semiente, como miembru de la Plataforma Asturiana Anti- Fracking, presentó nos rexistros de los conceyos de les cuenques del Nalón y del Caudal una propuesta de moción encamentando a dichos conceyos a declarase conceyos llibres de fracking. Concrétamente los conceyos de Casu, Sobrescobiu, Llaviana, Samartín del rei Aurelio, Llangréu, La Ribera, Mieres, Morcín, Riosa, Ayer y L.lena. Darréu unvióse comunicación d’esta propuesta presentada por rexistru a los distintos grupos municipales.
A la espera de qu’estes mociones cumplan col so oxetivu nos conceyos citaos, la Semiente entama una charra informativa sobre’l Fracking o Resquiebra Hidráulica esti miércoles día 16 a la 19.30 hores en La Casa La Cultura de La Felguera. Preténdese asi que la xente tenga una mayor conocencia sobre la tema y la so repercusión n’Asturies. L’encargáu de dar la conferencia ye Paco Ramos miembru de Ecoloxistes n’Aición y de la Plataforma Asturiana Anti-Fracking.