La Semiente pide la nulidá de les subvenciones pa la Cooperación en SMRA

Considera que les sos bases incumplen la llegalidá vixente, y nun garanticen la oxetividá ya igualdá

13 de avientu de 2012 DE 2012 • Glayiu

L’Asociación Cultural La Semiente, que dinamiza l’espaciu social homónimu de L’Entregu, presentó nel Rexistru Municipal un recursu de nulidá contra les bases que regulen les convocatories de les subvenciones p’asociaciones de calter social y cooperación internacional de Samartín del Rei Aureliu pal añu 2012, por entender que nun s’afayen a la llexislación vixente n’aspeutos fundamentales.

El colectivu social La Semiente considera que les citaes bases son "un absolutu despropósitu, amás de ser claramente illegales. Respuenden a la filosofía habitual de los socesivos gobiernos municipales de Samartín qu’aporfíen permanentemente n’introducir grandes cargues de suxetividá allá onde la Llei yos esixe tolo contrario, esto ye, oxetividá, col únicu fin de dexar l’arbitrariedá más absoluta per parte de los órganos de calificación y con ello introducir nel procedimientu la capacidá d’inclinar escontra un llau o l’otru les valoraciones que de les distintes opciones puedan realizase. A cencielles trátase de qu’estes bases sían consideraes nules y vuelvan salir nos términos contemplaos pola llegalidá vixente.".

Pero según afirmen nun comunicáu, estes práctiques que denuncien parecen ser habituales: "Esto vien yá de llueñe y ta yá bien asumio pola población como un practica normal, criticada, reprochada y claramente illegal a la vista de la xente, pero asumío con normalidá. Consideramos que ye hora de que’l pueblu salga del so conformismu y esixa respetu y responsabilidaes, de que tolos axentes sociales y les persones protesten ante ésti y cualquier ataque a la imparcialidá y a la falta de tresparencia, yá sía una convocatoria de subvenciones o una selección de personal llaboral".

La culpa de la esistencia d’irregularidaes nestes convocatories repártenla ente tolos grupos políticos: "Nun entendemos, amás, como ye posible que los grupos de la oposición nun refugaren estes bases, torgando la so aprobación y esixendo al equipu de gobiernu la ellaboración d’otres que garanticen los derechos fundamentales de quienes soliciten estes subvenciones".

Pa terminar La Semiente quiso distanciase de les práctiques subvencionaes: "Somos una asociación autoxestionada y autoxestionaria, que tomó como determinación filosófica y práctica dende la so fundación, la de non presentase nin optar a nengún tipu de subvenciones públiques nin privaes. Optando pol trabayu voluntariu, la autofinanciación y l’intercambiu de conocencies y esperiencies como’l so modelu de xestión. Pero que primero de too respeta a aquellos colectivos sociales y culturales qu’opten poles subvenciones pa poder desenvolver la so actividá, y que deberíen de poder faelo con igualdá d’oportunidaes y con total tresparencia".