La Política Llingüística invisible

8 de payares de 2012 DE 2012 • Vítor Suárez

Esiste una ofensiva creciente contra les polítiques qu’afalen la diversidá llingüística del Estáu español. Día tres día asistimos al desprestixu que sufre la política llingüística de los distintos idiomes del Estáu, calificándola de marafundiu, “mamandurria” y nun sé cuántes parides más.

Pero hai una política llingüística de la que naide fala. Una política llingüística qu’invierte 83.765.290 € nel Institutu Cervantes, con sedes per tol mundu o más de 2 millones na Real Academia Española (a la qu’Asturies aporta 27.121 € al traviés de la so fundación).

Ún de los trucos que la fai eficaz ye que va tan lloñe y ye tan omnipresente que se fai, de toes toes, invisible pa la mayoría de la xente. Asemeya daqué natural y ensin más consecuencies.

Nel desendolcu de la mesma xueguen un papel cimeru los medios. Una televisión pública española que contribúi de forma decisiva a tapecer la diversidá llingüística y cultural de los territorios del Estáu español ente la población residente en zones onde namái se fala castellanu y, d’otra miente, nos territorios con llingües propies, onde l’audiencia de los medios d’ámbitu estatal ye bien considerable polo que la falta de referencies a los distintos idiomes tamién ha tener dalguna influyencia sobre les sos actitúes. Por exemplu, nel casu d’Asturies, nun facilita que la población de llingua principalmente castellana amuese interés o respetu poles manifestaciones culturales n’asturianu o eonaviegu y, munchu menos, pol conocimientu y usu del idioma. Podemos dicir que la falta d’información sobre l’asturianu nos medios audiovisuales, d’Asturies y del estáu, manca fondamenta al usu del asturianu en xeneral y, poro, perxudica les sos posibilidaes de futuru.

Nestos momentos de cambéu onde too se reformula -y hasta ye posible un remocique del marcu constitucional- habremos de tar sollertes pa desanubrila, facela visible y que, asina, vaya perdiendo la so eficacia uniformadora.